27 Бардыгы /

«Антикинону толук жабуу боюнча сунуштамакчымын!» – деди Ош шаарынын вице-мэри Санталат Аманова Ош шаардык мэриясынын коллегиялык жыйынында. Анын айтымында, буга дейре антикино жайларында жашы жете элек 3 кыз  зордукталган. А түгүл бул боюнча кылмыш иши дагы козголгон.

– Жашы жете элек кыздар эле эмес, башка кыздар деле ошондой жерде алкоголдук ичимдиктерди тартынбастан ичишип, а түгүл ошол эле жерлерде, түнкү клубдарда отургандыгы абдан өкүндүрөт. Ошону үчүн кыздарыбыздын саламатчылыгын, ден соолугун, балдарга карата кылмыштуулуктун алдын алуу максатында ушул коллегиялык жыйында антикино жайларын токтоосуз түрдө жабууну сунуш этем! – деп чырылдады Ош шаарынын вице-мэри Санталат Аманова.

Ал эми Ош шаарынын мэри Жеңишбек Токторбаев: – 15-17 жаштагы кыздар зордукталып жатат. Муну кандай кылабыз? Кантип жабабыз? – деп коллегияга катышып олтурган милициянын жетекчисине күттүсүз суроо узатты. 

Анда Ош шаардык ички иштер башкармалыгынын жетекчиси, милициянын полковниги Дамирбек Исаков: – Туура. Муну жаппасак болбойт! Тилекке каршы ушундай факты бар. Санталат Абдылдаева айткандай, бул жайларды токтоосуз жабыш кажет! Кыргыздын менталитетине туура келбей калат экен, – деп баса айтып, бул маселе боюнча Ош шаардык мэриясынын жана Ош шаардык кеңешинин өзгөчө жардамы керектигин дагы шардана кылды.  

Тилекке каршы. Ош шаарынын чоңдорунун бул айтышы соңунда эч кандай жоопсуз калтырылды…

Алишер ТОКСОНБАЕВ, өз кабарчы