1,910 Бардыгы /

Мына таягын колуна алып бир жагынан эжеке жетелеген карыган, араң, шашпай баскан, көзү да жакшы көрбөй калган агайдын карааны көрүндү. Аудиториядагы студенттер жапырт ордунан туруп салам беришти.
-Отургула айланайындар –деп сылык сүйлөп, колу менен отургучту кармалап өзү да отурду. Ар дайымкыдай биздин колубуздагы сабактын пландарын сурап «Кимде кандай суроо бар» дегенсип башын өйдө көтөрдү да:-Сурагыла, -деди.
-Агай кечиресиз, суроо менен кайрылсам болобу,-деди артта бир үн. Ар дайым агайга студенттер ушинтип кайрылчу. Агай көзү көрбөгөнү менен кимдин үнү экенин даана ажыратчу.
-Ооба Айбек, сүйлө,- деди агай .
-Илимге жан дүйнөм кирип жаңы ачылыштарды жасап, элим үчүн, урпактар үчүн кызмат кылсам дегем, сиз мага жардам бериңизчи?
-Жакшы, а түгүл эң жакшы. Кайсы тармак боюнча аны тандашың керек, андан кийин татыктуу жетекчи, анан гана илимге багыт алыш үчүн кадамыңды карышташың керек. Алгач сага 10 насаат айтам. Турмушта да, илимде да бул насааттардын пайдасы зор.
1. Ар дайым илим үстүндө бол.
2. Изденгенден тажаба!
3. Өзүң жасай турган ишти өзүң гана аткар. Жасай албайсыңбы, баштаба!
4. Ар бир жаза турган нерсени өзүң жаз, жаза албайсыңбы бөлөккө жаз деп бербе, андан көрө жазылбай калганы дурус.
5. Плагиат болбо! Бирөөнүн эмгегин, нанын жегениң менен барабар. Илимдин уурусу атка коносуң.
6. Кесиптештериңдин көңүлүн оорутпа.
7. Ар бир жазган эмгегиң өз мээнетиң менен изилденсин.
8. Өзүңдөн кийинкилерге үлгү бол, жол көрсөт, жаман жагына эмес, жакшы жагына гана.
9. Бир иш колуңан келсе мен жасадым дебе, сенден башкалар да жасай алат.
10. Бирөөнүн кемчилигин жүзөгө чыгарбай жашыра бил.
Буларды угуп отурган студенттер агайдын жасаган иштери менен насааттары дал келгенине таң кала, бир эсе суктана карашты. Сабак андан ары кызыктуу уланды.
Агай ар дайым илимге басым жасап, Кыргыз эли үчүн кызмат кылам дегенди колдоп, а түгүл насааттарын да аячу эмес. Жаткан жериң жайлуу, жайың бейиште болсун Кеңешбек Малтаевич.

Гулзар Бокоева, Кара-Үңкүр орто мектеби тарых мугалими, Ала-Бука району