1,538 Бардыгы /

ОШ. «Ош-Тазалык» адистештирилген муниципалдык ишканасына техника сатып алуу үчүн 1 миллион 900 миң евро бөлүнөт. Ушул тапта ишканага жыйырмага жакын жаңы техника сатып алуу пландалып жатат. Ал эми каражатты Европа өнүктүрүү жана реконструкциялоо банкы бөлүп бермекчи.  

Бирок, Ош шаарынын айрым активисттеринин айтымында, техникаларды алмаштыруу маселеси курч бойдон турганда ишкананын имаратын оңдоонун дегеле зарылчылыгы жок! Буга дейре ишкананы Талант Капаров жетектеген маалда имараттын чириген полдору, эшик-терезелери дээрлик жаңыртылган. Ал эми ишкананын азыркы жетекчиси Нурбек Исмаилов имарат дагыле болсо оңдоого муктаж экендигин канкакшап келет.

         – Ишкананын бөлмөлөрү көп убакыттан бери оңдоодон өткөн эмес! Каалгаларын дагы катарынан алмаштыруу керек. Оңдоо иштерине ишкананын бюджетинен 250 миң сом гана ажыратылган. Эми сатып алуу порталы тендер жарыялайт. Тендерди утуп алган компания гана бул өңүттө иш алып барат. Бирок, биз алардын акысын дароо бере албайбыз. Бөлүп-бөлүп төлөө жолу менен кутулууну гана пландащтырып жатабыз, – дейт «Ош-Тазалык» адистештирилген муниципалдык ишканасынын жетекчиси Нурбек Исмаилов.  

Анткени менен айрым жалпыга маалымдоо каражаттары сатып алуу порталына шилтеме жасоо менен оңдоп-түзөө иштери тендерсиз эле башталаарын жазып чыгышкан.
А ишкана өзүн-өзү гана каржылайт. Мекеме жыл сайын мэриядан 36 миллион сом гана субсидия алат. Ишкананын мурунку жетекчиси мэрия тарабынан бериле турган акчадан баш тарткан эле. Ал эми азыркы директору Нурбек Исмаилов мекеме мэриядан субсидия албаса, кызматкерлердин эмгек акысын төлөө кыйын экендигин канкакшап келатат.

Учурда  «Ош-Тазалык» адистештирилген муниципалдык ишканасынын карамагында 57 техника бар. Мунун ичинен 30у гана туруктуу иштейт. А ишкананын жалпы 200 миң абоненти жана 470 кызматкери бар.

Алишер ТОКСОНБАЕВ, өз кабарчы