1,913 Бардыгы /

2018-жылы КР Өкмөтүнө караштуу Мамлекеттик салык кызматынын расмий сайтына 6 млн 314  миң 543 колдонуучу кирген. Бул 2017-жылга салыштырмалуу дээрлик эки эсеге көп, анда ведомствонун сайты 3 млн 552 миң 946 жолу колдонулган.

Салык кызматынын www.sti.gov.kg расмий сайтына киргендердин көбү төмөнкү рубрикаларды пайдаланышкан: “Электрондук сервис” – 899 миң 857 колдонуучу, “Отчеттордун формасы” – 601 миң 306 жана “Билим базасы” – 223 миң 678 колдонуучу.

Белгилей кетсек, Салык кызматы акыркы жылдары ведомствонун сайты аркылуу салык төлөөчүлөргө көрсөтүлүүчү инновациялык кызматтарды жигердүү киргизүүдө. Онлайн кызматтар менен бирге салык отчетторун, салык декларациясын тапшыруу, электрондук патент сатып алуу, МСКнын адистери менен онлайн түрдө байланышуу ж.б. боюнча тийиштүү электрондук сервистер иштөөдө.

Мындан тышкары, салык төлөөчүлөргө өздөрүнүн ИСНин текшерүүгө, салык төлөөчү катары катталууга, мүлк салыгын жана камсыздандыруу төгүмдөрүн эсептөө боюнча электрондук жардамды жана калькуляторду пайдаланууга мүмкүндүк берген сервистер камтылган. Салык төлөөчү инспектордун текшерүүгө жазма буйругу бар экендигин да текшере алат жана акциздик марканы, патентти, салык төлөнгөндүгү тууралуу чегин жана эсеп-фактурасын издей алат.

“Салык отчетторунун формалары” рубрикасында бир катар салык кызматтарды алууга болот, алсак, салыктын ар бир түрү боюнча отчеттун формасын, Бирдиктүү салык декларациясын, арыздардын жана МСКнын чечиминин формасын ж.б. көчүрүп алууга болот.

“Билим базасы” рубрикасында салык салууга тиешелүү болгон чечнемдик укуктук актыларды, камсыздандыруу төгүмдөрү, ЕАЭБ ж.б. жөнүндө зарыл болгон жана кызыктуу маалыматтарды таба алышат.

www.sti.gov.kg интернет порталында жарандардын кайрылуу тартиби, бош кызмат орундары, кызматка кабыл алуунун шарттары, салык кызматынын маалыматтык саясаты жөнүндө сурап-билүү багытында маалыматтар жайгаштырылган.

Бир сөз менен айтканда, Мамлекеттик салык кызматынын сайты салык төлөөчүлөргө жана сайттын бардык колдонуучуларына салык жаңылыктары туурасында маалымдар болуп турууга мүмкүндүк берет.

Сайпидин СУЛТАНАЛИЕВ