1,135 Бардыгы /

Иракта соттолгон тажик аялдардын айрымдары балдарынын мекенине кайтарылышына макул болбой жатышат.

Тажикстандын Сауд Арабиясындагы дипломатиялык өкүлчүлүгүнүн маалыматына караганда, Иракта жалпысынан мекенине жөнөтүлүшү керек болгон 95 бала катталган. Бирок мыйзам боюнча апалары алардын Тажикстанга кайтарылышына макулдугун бериши керек.

Тажикстандын Кувейт менен Ирактагы элчиси Зубайдулло Зубайдзоданын айтымында, соттолгон 43 аялдын 15и балдарын мекенине жөнөтүүдөн баш тартышкан. «Көбү туугандары алардан баш тартышканын айтып, балдарын кабыл албай коюшарын билдиришүүдө. Биз аларга балдары кароосуз калбай турганын айтсак да макул болбой жатышат», — деди элчи.

Анын айтымында, дипломаттар соттолгон мекендештердин туугандары менен дайыма байланышта болуп, кандай жол менен болсо да балдарын мекенине кайтарууга аракет кылышууда. «Бул президенттин буйругу. Балдар ата-энелеринин кылгандыгы үчүн жооп бербейт да. Эгер балдарды туугандары кабыл алуудан баш тартса, алар мамлекеттин камкордугунда болушат», — деп белгиледи дипломат.

Ал кошумчалагандай, Иракта соттолгон тажик аялдар менен балдардын тизмеси мындан да көбөйүшү мүмкүн. Анткени кармалган тажикстандык аялдар башка өлкөнүн жараны экенин айткан учурлар дагы катталууда.

www…