1,579 Бардыгы /

ОШ. Интернетте Ош шаарынын Он-Адыр аймагында эки улуттун өкүлдөрү мушташты деп тараган видеодогу окуя Ош шаарында болгон эмес. Тарап жаткан маалыматтар чындыкка дал келбейт. Окуя коңшу Өзбекстанда болгондугу боюнча аталган өлкөнүн массалык маалымат каражаттарында жарыяланган. Бул тууралуу Ош шаардык мэриясынын басма-сөз кызматы  мааалымдады.

Маалыматка ылайык, бүгүн, 24-январда Ош шаарынын мэри Таалайбек Сарыбашов интернетте тараган жалган маалыматтар боюнча укук коргоо органдарынын жетекчилери менен жыйын куруп, чагымчылдык кылгандар сөзсүз жазага тартылышы керектигин айтты.

Ош ШИИБнин башчысынын орун басары Т. Нурбаев жалган маалыматты тараткандар сөзсүз жоопко тартылаарын билдирди. УКМКнын өкүлдөрү учурда Ош шаарында коомдук-саясий абал тынч экенин билдирип, чагымчылдыкка жол берилбей тургандыгын айтып өтүштү.

Амир-Темир аймактык кеңешинин жооптуу катчысы М. Абдуллаев да Он-Адырда мушташ катталбаганын жана жалган экенин кошумчалады.