1,430 Бардыгы /

Жалал-Абад шаарынын мэри Мураталы Тагаевди Индонезиянын Денпасар шаарынын мэри жана Бүткүл дүйнөлүк “Бириккен шаарлар жана жергиликтүү бийликтер” уюмунун Евразия аймактык бөлүмүнүн башкы катчысы Р.К Сагитов кат аркылуу быйылкы жылдын 28-апрель – 2-май күндөрү Индонезияга келүүгө чакырышты. Бул тууралуу шаар мэриясынан билдиришти.

Маалыматтарга караганда, бул күндөрү аталган өлкөнүн Денпасар шаарында Евразиянын мурастары боюнча Бүткүл дүйнөлүк шаарлардын IX эл аралык конференциясы болуп өтөт. Ал жерде ар кандай климаттык шарттарга жана техногендик таасирлерге байланыштуу шаарлардагы маданий-тарыхый мурастардын жок болуп баратышы тууралуу маселе талкууланмакчы.

Мындай жогорку деңгээлдеги ири иш-чара ЮНЕСКОнун алдында Индонезиянын президенти Джоко Видодонун жана Евразиянын, Тынч океанынын аймагындагы өлкөлөрдүн, шаарлардын башчыларынын катышуусу менен өткөрүлөт.

Чакыруучу тарап Жалал-Абад шаарынын мэри өз шаарындагы маданий-тарыхый мурастарды сактоо багытындагы долбоорлор боюнча доклад менен чыгууну сунушташты.

Денпасар – Индонезиядагы Бали аралынын башкы шаары жана ошол провинциянын борбору. Шаар айланасын кошкондо 700 миң эл жашайт.

“Аймак”