САМОЛЕТУ ЖОК САНАВИАЦИЯ

2,693 Бардыгы /

Эсибизде. Тээ Союз маалында Кыргызстандын бардык облустарындагы ооруканаларда СанАвиация бөлүмү үзгүлтүксүз иштеп, а түгүл алардын атайын АН-2 самолеттеру дагы бар эле. Кокус зарыл чакыруу түшсө, самолет жердин алыстыгына жана аба ырайынын катаалдыгына карабастан сөзсүз учуп, кошо барган докторлор сыркоолорду жеринде эле текшеришип, эгерде акыбалы абдан оорлошсо, өздөрү менен кошо шаарга алганча дагы келишчү.

– Азыр балээниби? Антишмек түгүл, баардыгын транспорт жоктугуна шылтоолошуп, оңой гана кутулуп келатышат. Анан айлабыз таптакыр куруганда, Ошко дейре өзүбүз атайын машина жалдап, сыркоолорду ар кандай жолдор менен эптеп борборго жеткирип жатабыз, – деп агынан жарылды Кара-Кулжа районуна караштуу Алайкуу айыл өкмөтүнүн тургуну үмүтбек Маматалиев. – Советтер Союзунун тушунда Ош шаарынан Алайкуу өрөөнүнүн Кызыл-Жар кыштагына эле үч маал АН-2 самолету каттачу. А жанагындай медициналык “Тез жардам чакырганыбызда, Ош облустук ооруканасынын СанАвиация кызматынан АН-2 самолету дароо учуп барчу. Акыбалы абдан эле оорлошкондорду ошону менен борборго дагы алып келишчү.

– Совет доорунда азыркы Алай жана Чоң-Алай райондору бир эле

аймак эмес беле. Зарыкканда, ошол жактарга деле доктор чакыртсаң, дарыгерлер тобу дары-дармеги менен дароо учуп жетип барышчу, – деп чырылдады Алай районунун Корул айыл өкмөтүнүн жашоочусу Айтпай Жээналиев. – А азырчы? Ар шылтоону айтышып, жөн дагы келишпейт. Өтө алыскы айылдарга, чындыгында, барбай деле коюшат. Ичим ачышканы:азыркы коомубузда Адам фактору таптакыр эле көңүл сыртында калды. Эң жаманы: бардык маселени, мунун ичинде Адам тагдырын дагы, акча гана чечип атат… Болбосо, ушул тапта СанАвиацияны мурдагыдан дагы жандандырып, заман талабына жараша туруктуу бир-эки вертолот күтүшсө, мындан мамлекет гана утмак…

Бир кездеги СанАвиация кызматын эмне үчүн жоюп жиберишкендигин Ош облустар аралык клиникалык ооруканасынын Шашылыш жана Пландуу медициналык Кеңеш берүү бөлүмүнүн башчысы Абдикерим Абдырахмановдон такып сураштырдык.

– Бир кездеги СанАвиация ушул таптаОш облустар аралык клиникалык ооруканасынын Шашылыш жана Пландуу медициналык Кеңеш берүү бөлүмүнүн кичнине гана бөлүмчөсү. Ырас, илгеркидей самолетубуз жок! Бирок, эки “Тез жардам” машинабыз бар, – дейт Ош облустар аралык бириккен клиникалык ооруканасынын Шашылыш жана Пландуу медициналык Кеңеш берүү бөлүмүнүн башчысы Абдикерим Абдырахманов. – Бизде 0770 68 88 80 телефонукүнү-түнү иштейт. Ал жерде кадимкидей кезметчилер дагы такай олтурушат. Чакырган жерге жанагыл машиналар менен эптеп жетип барабыз. Мурда биздин мекемеге бир вертолот берилет деген дагы сөздөр жүрдү эле. Ошол болсо, кана? Сыркоолордон тил укпастан, тээтигил Исфара, Чаткал, Чоң-Алай, Алайкууга дейре учуп гана бармакпыз…

Кайтып келатканыбызда Ош облустар аралык бириккен клиникалык ооруканасынын Шашылыш жана Пландуу медициналык Кеңеш берүү бөлүмүнүн СанАвиация кызматына шашылыш чакыруу түштү. Чакан топ СанАвиациянын “Тез жардам” машинасын минип, алыскы Чаткалды карай чапкылашты…