1,408 Бардыгы /

Дональд Трамп менен Ким Чен Ын Ханойдогу жолугушууда макулдашууга келе алышкан жок. Бул тууралуу Ак үй билдирди.

«Эки өлкөнүн өкүлдөрү алдыда бул боюнча сүйлөшүүлөрдү улантышат», — деп жазылган мекеменин билдирүүсүндө.

Трамп менен Кимдин документтерге кол коюу салтанаты сыяктуу эле алардын биргелешкен тамактануусу дагы болгон жок.

Саммиттин жыйынтыгы боюнча өткөн маалымат жыйында Трамп Түндүк Корея өзөктүк куралдан баш тарта турганын, бирок бул үчүн өлкөгө киргизилген бардык санкцияларды алууну талап кылганын айтты. «Алар санкцияларды толук алдырууга ниеттенип жатканын айтышты. Биз ага макул болгон жокпуз», — деди президент.

Бирок Трамп Түндүк Корея менен макулдашууга келүүдө дале болсо «оптимизм бар экенин» белгилеп, анын Ким менен «достук» мамилеси сакталып калганын айтты. Ал ошондой эле Түндүк Кореянын лидери ага өзөктүк-ракеталык сыноолорду өткөрбөө убадасын бергенин кошумчалады.

Трамп менен Кимдин бүгүнкү сүйлөшүүлөрүнүн негизги темасы Пхеньянды өзөктүк куралсыздандыруу болгон. Жолугушуунун алдында Трамп «туура макулдашууга» кол коюуга шашылбай турганын айткан. «Эгер мамилелер жакшы болсо, анда көптөгөн жакшы иштер болушу мүмкүн», — деген ал. Өз кезегинде Ким Чен Ын аларды «бүткүл дүйнө жүзү» карап жатканын белгилеп, айрымдары үчүн бул «фантастикалык тасманын» сюжети катары көрүнүп жатканын айткан.

Жалпысынан бүгүнкү сүйлөшүүлөргө беш саат убакыт каралганы менен жолугушуу үч мүнөттө гана аяктады. Бул АКШ менен Түндүк Корея лидеринин экинчи саммити. Алгачкысы былтыр июнда Сингапурда өтүп, анда Пхеньянды өзөктүк куралдарын азайтууга, ал эми АКШны коопсуздукту кепилдөөгө милдеттендирген документке кол коюлган. Бирок кийинчерээк маалымат каражаттары Түндүк Корея өзөктүк иштеп чыгууларын улантып жатканын жазып чыгышкан.

www.