1,703 Бардыгы /

БАТКЕН. Кадамжай районунун Үч-Коргон айыл өкмөтүнө караштуу Боз айылындагы мыйзамсыз казылып жаткан шахтада акыркы бир айда эле эки адам каза тапты. Бул туурасында Өзгөчө кырдаалдар министрлигинен кабарлашты.

Маалыматка караганда, үстүбүздөгү жылдын 28-февралында Боз айылындагы эски шахтада 75 метр тереңдикте өз алдынча көмүр казып жаткан 35 жаштагы Ф.А. газга ууланып жеринде каза тапкан. Буга дейре андан жыйырма күн мурун ошол эле шахтада 38 жаштагы адамдагы «кара алтын» алып чыгып баратканда арканы үзүлүп кетип, чуңкурга кулап, жарык дүйнө менен кош айтышкан.

Жергиликтүүлөрдүн айтымында, аталган жерде алтымыштан ашуун көмүр шахтасы бар. Бул жайларды Кызыл-Кыя шаарынын, Ноокат районунун жана Боз айылынын тургундары дагыле өздөрү иштетип келатышат. Аларда жалпы жонунан эки жүздөн ашуун жергиликтүү тургун эмгектенишет. Тактап айтканда, ар бир көмүр казылуучу жайда беш-алты адам иштейт. Айтмакчы, бул шахта тээ Союз маалында эле иштетилип, СССР тарагандан кийин жумушун дароо токтоткон. Көмүр шахтадаиштөө абдан кооптуу. Аталган жайда жергиликтүү бийлик тарабынан коопсуздук боюнча тынымсыз түшүндүрүү иштери деле жүргүзүлүп келатат. Ошого карабастан өз алдынча көмүр кенин казуучулар иштерин дагыле токтотуша элек.
Былтыр дагы Боз айылындагы мыйзамсыз казылып жаткан шахтада бир адам каза тапкан. Жергиликтүү бийлик электр чубалгысын үзүп, көмүр казгандардын ишин токтоткон учурда дагы алар Кызыл-Кыя шаардык мэриясынын алдына митингге чыгышкан. Алар жумуш таап берүүнү, же көмүр казууга тыюу салбоону суранышкан. Көмүр казуучулар иштеп жаткан убакта кандай окуя болсо дагы өздөрү жооптуу экендигин айтышып, а түгүл атайын тил катка кол дагы коюп беришкен. Алардын биринин дагы «кара алтын» казууга лицензиясы жок. Ошондуктан,  жергиликтүү бийлик эски шахтаны жабууга дагыле аракет кылууда. Бул үчүн Өкмөттүн токтомудагы чыккан.

                   Алишер ТОКСОНБАЕВ, өз кабарчы