3,069 Бардыгы /

Билим алып, окуй албаган мүмкүнчүлүгү чектелген жарандар жок дегенде өнөр менен алдыга жылгысы келет. Учурда бир өнөрдүн башын кармап өркүндөтүп, өз арабасын алдыга сүйрөп бара жаткан аярлуу адамдар да жок эмес. Ал эми Жалал-Абад шаарындагы айрым  ден соолугунан мүмкүнчүлүгү чектелүү жарандар аймакта кеңири жайылбаган жаңы өнөрлөрдү өздөштүрүү менен алек болушууда.

Шавкатбек Жолдошев күн сайын тигүү машинасын өздөштүрүү менен алек. Анткени каарманыбыз  II топтогу майып болгондугуна байланыштуу ортопедиялык бут кийим кийет. Мындай бут кийимдерди област аймагында эч ким жасабайт. Тигүү машинасы алгачкы гана кадам, андан ары дагы үйрөнүп билүү менен өзү сыяктуу мүмкүнчүлүгү чектелгендер үчүн бут кийим тигүүнү ниет  кылган.

“Бизде ортопедиялык бут кийимдерди жасаган усталар жок. Мен азыр тигүү машинасын жакшылап өздөштүрдүм эми Ошко барып бут кийимдерди тигүүнүн сырын үйрөнсөм, ден соолугу чектелүү адамдарга пайдам тийет” – Ш.Жолдошев.

Алмаздуу таштардан жана саймадан жасалган сүрөттөр азырынча Жалал-Абад шаарында кеңири жайылтыла элек. Колдун майда иши, көп убакытты талап кылгандыктанбы бул өнөрдү билгендер да аз. Бирок ден соолугунун алсыздыгына карабай ушул иш менен Жалал-Абад шаарынын тургуну Гүлзат Айдарова алектенип келет. 

Канчалык өнөрлүү болгону менен кантсе да мүмкүнчүлүгү чектелүүбү айтор жасаган кол өнөрчүлүктөрүн базарга алып чыгууда, сатууда кыйналышат. Ошондуктан мекеме-ишканаларды кыдырып айлыкка карызга таштап келип өткөрүшөрүн билдирди Жалал-Абад шаарындагы мүмкүнчүлүгү чектелген жарандарга өнөр-таланттарды үйрөтүүчү “Даанакер” коомдук бирикмесинин жетекчиси Айжамал Тарыхчиева. 

Эске сала кетсек, Жалал-Абад шаарында 1 114 ден соолугунан мүмкүнчүлүгү чектелген жарандар бар. Ошондой эле, аярлуу жарандарды ар тараптуу өнүктүрүү үчүн областтык жана шаардык майыптар коомдук бирикмелери иш алып барышат.

Роза АКМАТЖАН КЫЗЫ “Аймак”