1,571 Бардыгы /

Европа биримдиги (ЕБ) «Мемориал» укук коргоо борборунун Грозныйдагы бөлүмүнүн башчысы Оюб Титиевди тез арада бошотууну талап кылды. Титиев маңзат сактоо иши боюнча төрт жылга жатак абагына кесилген.

ЕБдин тышкы саясат кызматынын билдирүүсүндө Титиевге карата чыгарылган сот өкүмү анын укук коргоочулук ишмердүүлүгүнө түздөн-түз байланыштуу экени жана анын адилеттүү соттук териштирүүгө болгон укуктары сакталбагандыгы жазылган.

​Евробиримдик ошондой эле Титиевге чейин «Мемориалдын» Грозныйдагы бөлүмүн жетектеген Наталья Эстемированын 2009-жылдагы өлүмү үчүн эч ким жоопко тартыла электигин белгилеген.

Европа кеңешинин адам укуктары боюнча комиссиясынын башчысы Дуня Миятович Оюб Титиевге карата чыккан сот өкүмүн Чеченстандагы адам укуктарын коргоо тармагындагы «кооптуу жагдайдын» кезектеги мисалы деп атады.

Ал кайрадан Орусияны эл аралык милдеттенмелерин аткарууга жана сот системасынын укук коргоочуларды куугунтуктоо үчүн пайдаланылбашына көз салууга чакырды. Миятович ошондой эле Титиевдин ишине байланыштуу кайрадан Орусиянын башкы прокурору Юрий Чайкага кайрылууга ниеттенип жатканын билдирди. Анын буга чейинки кайрылуулары жоопсуз калган.

18-мартта Чеченстандын Шалин шаардык соту Оюб Титиевди маңзат сактоого күнөөлүү деп таап, жатак абакка төрт жылгаэркинен ажыраткан. Укук коргоочунун адвокаттары бул өкүм боюнча жогорку баскычка даттана тургандыктарын билдиришти. «Мемориал» сот өкүмүн саясатташкан чечим деп атады.

Оюб Титиев былтыр январдын башында кармалган. Тергөөнүн маалыматына караганда, анын автоунаасынан марихуана табылган. Титиев бул айыптоону четке кагып, маңзатты полиция кызматкерлери салып койгонун билдирүүдө. Титиевдин кесиптештери бул иш атайын уюштурулганын белгилеп, чечен бийлигинин республикадагы укук коргоочулардан кутулуу аракеттери жөнүндө айтып келишет. Буга чейин Титиевди эл аралык уюмдар менен маданият ишмерлери колдоп чыгышкан.

www.