Тажикстанда ал башка бир кылмыш иши үчүн күнөөлөнүүдө.

Маалыматтарга караганда, Ёкуб Гафуров 20 жыл мурун Тажикстанда “куралдуу каракчылыкка барган, киши өлтүргөн” деп шектелүүдө. Ал Душанбенин өтүнүчү менен экстрадицияланды.

2010-жылы февралда Ёкуб Гафур Ташкенттеги “Ильхом” театрынын режиссери Марк Вайлды өлтүргөнү үчүн 19 жылга соттолгон. Анын эки шериги – Кахрамон Пулатов менен Алишер Саттаров 17 жылга эркинен ажыратылган. Бул кылмыш ишин уюштурду деп эсептелген Умид Исхаков качып кеткен, азыркыга чейин эл аралык издөөдө.

Режиссер Марк Вайлды 2007-жылы 6-сентябрда үйүнө кире берерде бычак менен сайып кетишкен. Ал ооруканада көз жумган.

Ташкенттик театр сынчысы Абдумалик Турдиевдин айтымында, режиссерду “Куранга окшоштуруу” спектаклинде Мухаммед пайгамбарды мазактаганы үчүн жазалашкан.

Сотто Ёкуб Гафуров режиссер кудайга акарат келтиргенин билдирип, аны өлтүргөнүн мойнуна алган.

Тажикстан ИИМинин басма сөз кызматы Ёкуб Гафуровдун тергөө иштери уланып жатканын кабарлады.