1,769 Бардыгы /

БИШКЕК. Кыргыз Өкмөтү жана АКШнын Эл аралык өнүгүү боюнча агенттиги (ЮСАИД) “Кургак учукка каршы күрөштө акыркы беш жылда жетишилген ийгиликтер” аттуу конференцияда бул өңүттө жетишкендиктерин ачыкташты.

Аталган иш-чарага 250 мамлекеттик кызматкер, медицина өкүлдөрү жана Эл аралык Уюмдардын кызматкерлери катышышып, жыл сайын 500 адамдын өмүрүн кыйган дарттын бүгүнкү көйгөйлөрүн орой-чарай талкуулашты.
Ошентип, беш жыл аралыгында Кыргыз Республикасында ЮСАИД каржылаган “Кургак учукту жеңебиз!” жана “Кургак учуктун чакырыктары” долбоорлору жүзөгө ашырылды. Булардын алкагында сезилээрлик жылыштар байкалды. Маселен, мунун аркасында аталган дарттын негизиндеги өлүм 26 пайызга кыскарды, ал эми оору 13 пайызга төмөндөдү. Кургак учукту дарылоону реформалоо системасы 19 миллион сомду (1,7 миллион АКШ долларын) үнөмдөөгө шарт жаратты. Бул каражаттардын бардыгы эми медициналык кызматтарды жакшыртууга, дары-дармектерди сатып алууга жана саламаттыкты сактоо тармагын инновациялоого жумшалмакчы.
– USAIDдин техникалык жардамы бизге куп эле жардамдашып жатат. Ошондуктан, бул долбоордун бардык катышуучуларына ыраазычылыгымды гана билдирмекчимин. Анткени, кургак учук менен күрөш жеңил жумуш эмес! – деди Президенттин аппаратынын жарандык өнүгүү, диний жана этникалык саясат бөлүмүнүн башчысы Назгүл Ташпаева.

Ал эми USAID уюмунун Кыргыстандагы директору Гэри Линден анын агенттиги кургак учук менен күрөштүү мындан ары дагы ыраатуу түрдө улантаарын ачыктады:

– Мен кургак учук ушул тапта Кыргызстанда баш оорутмага айлангандыгын билем. Ошондуктан, алдыда АКШ Өкмөтү бул дартка каршы күрөшүңүздөрдү дагы колдомокчу. Мен терең ишенем, биз биргеликте кургак учукту акырында жеңебиз!

Акыркы маалыматка таянсак, Кыргызстанда жыл сайын алты миң адам кургак учук дартына кабылат. Мындан тышкары Дүйнөлүк саламаттыкты сактоо Уюму Кыргызстанды кургак учуктун түрлөрү эң көп таралган отуз өлкөнүн сабына кошуп олтурат.
Алишер ТОКСОНБАЕВ, өз кабарчы