1,806 Бардыгы /

Венесуэланын борбору Каракаста оппозиция лидери Хуан Гуайдонун тарапташтары коопсуздук күчтөрү менен кагылышты. Эки тарапта тең куралчан кишилердин бар экени айтылууда.

Көздөн жаш агызуучу газ колдонулууда. Reuters кабарчылары атышуулар орун алып жатканын билдиришүүдө.

Гуайдо шейшемби күнү эртең менен аскер формачан кишилердин курчоосунда сөз сүйлөп, армияны президент Николас Мадурого каршы нааразылык акцияларына катышууга чакырган видеокайрылуу жолдогон. Мындан соң анын тарапташтары Каракастагы аскер аба күчтөрүнүн базасында чогулушкан. Гуайдо кийинчерээк журналисттерге армиянын бир бөлүгү анын тарабына өткөнүн жарыялаган.

Азырынча канча аскер Гуайдону колдогону белгисиз.

Гуайдого үй камагында отурган оппозиционер Леопольдо Лопес дагы кошулду. Ал аны Гуайдону колдогон аскерлер бошотконун билдирди.

Венесуэланын маалымат министри Хорхе Родригес куралдуу күчтөрдүн катарындагы “анча чон эмес саткындар тобу” өлкөдө төңкөрүш жасоого аракат кылганын кабарлады. Коргоо министри Владимир Падрино –Мадуронун тарапташы армия козголоңду колдогон жок деп маалымдады.

АКШ президентинин улуттук коопсуздук боюнча кеңешчиси Жон Болтон Твиттерде Венесуэла армиясын Конституцияны жана легитимдүү бийликтин башында турган Гуайдо менен Улуттук ассамблеяны коргоого чакырды.

Венесуэлада саясий курч тирешүүлөр январда башталган. Гуайдо Мадурону бийликти узурпациялоого айыптап, өзү өлкөнүн убактылуу президенти катары ант берген. Бирок бийликти башкаруу каражаттары жана күч түзүмдөрү Мадуронун колунда. Аны Куба, Орусия, Кытай жана Түркия колдоодо. АКШ, Латын Америкадагы басымдуу өлкөлөр жана ЕБ Гуайдону кубаттоодо.

www.