1,363 Бардыгы /

           БИШКЕК. Кыргызстандын Президенти Сооронбай Жээнбеков ШКУга мүчө-мамлекеттердин Коопсуздук Кеңешинин катчыларынын жыйынына катышуу үчүн келген Кытай Эл Республикасынын коомдук коопсуздук министри Чжао Кэчжини кабыл алды.

            Сооронбай Жээнбеков Кыргызстан Кытай Эл Республикасы менен эки тараптуу кызматташууга абдан чоң маани бере тургандыгын баса белгиледи: – Кытай Эл Республикасынын жетишкендиктерине Кыргызстан ар дайым чын ниеттен гана кубанат. Былтыр  июнь айында биз мамилелерибизди ар тараптуу стратегиялык кызматташтык деңгээлине чыгардык. Биздин ортобуздагы достукка, ынак кошуналыкка жана өз ара ишенимге негизделген жемиштүү кызматташтыкты өнүктүрүүгө өбөлгө жаратчу толук түшүнүшүү бар!

            Сооронбай Жээнбеков Кыргызстанга Кытайдын коргоо министри келип кеткендигин, жакында Тышкы иштер министринин келиши күтүлүп жаткандыгын эске салды. КЭРдин Төрагасы  Си Цзиньпиндин жооп иретинде Кыргызстанга мамлекеттик сапар менен  келиши эң маанилүү иш-чара болуп калаарын дагы кошумчалады: – Сапар эң жогорку деңгээлде өтүп, Кыргыз-Кытай эки тараптуу кызматташтыгын тереңдетүүгө гана өбөлгө жаратааарына терең ишенем!

            КЭРдин коомдук коопсуздук министри Чжао Кэчжи жылуу кабыл алгандыгы үчүн терең ыраазычылыгын билдирип, Сооронбай Жээнбековдун Кытайга сапары жана анын КЭРдин Төрагасы Си Цзиньпин менен жолугушуулары Кыргыз-Кытай кызматташтыгын тереңдетүгө гана бекем өбөлгө болуп жаткандыгын жашырган жок.

            – Биздин өлкөлөр ортосундагы кызматташтык, мунун ичинде аскерий-техникалык чөйрөдө дагы стратегиялык деңгээлге көтөрүлдү. Биз Кыргызстан менен кызматташууну жогору баалайбыз жана эл аралык келишимдердин алкагында көп  тараптуу стратегиялык өнөктөштүктү дагы өнүктүрүгө даярбыз. Биз Кыргызстан бийлигинин өлкөдө жана аймакта туруктуулукту бекемдөө жаатындагы аракеттерине чоң маани беребиз. Ошондой эле биз өлкөнүн бакубаттуулугун арттыруу максатында Сиздин аракеттериңизди бекем колдойбуз жана Сиздин жетекчилигиңиз алдында Кыргызстан ыкчам өнүгүүгө жетишет деп бекем ишенебиз!— деп баса белгиледи Кытай Эл Республикасынын коомдук коопсуздук министри Чжао Кэчжи. КЭР Өкмөтүнүн өкүлү Кыргыз тарап ШКУга мүчө-мамлекеттердин башчыларынын жыйынына жана Си Цзиньпиндин Кыргызстанга алдыдагы сапарына активдүү камылга көрүп жаткандыгын дагы баса белгиледи.

         Жолугушуу соңунда жамандыктын үч күчүнө — терроризмге, экстремизмге жана сепаратизмге каршы туруу, аймактагы  коопсуздукту биргелешип бекемдөө маселелери  боюнча дагы тараптар өз ара пикир алмашышты.

Алишер ТОКСОНБАЕВ, өз кабарчы