1,100 Бардыгы /

Ички иштер министрлиги «Акнет» ишканасына карата козголгон кылмыш ишине байланыштуу компаниянын президенти Кубан Ажимудиновду жана анын шериктерин камакка алды.

Бул тууралуу ИИМдин басма сөз кызматы кабарлады. Маалыматка караганда, Ажимудиновдон сырткары «Строй Сеть» компаниясынын Л.И. аттуу башкы эсепчиси менен Б.Е. аттуу директору кармалып, Бишкек ШИИБинин тергөө абагына камалды. Тергөө «Строй Сетти» ири суммадагы каражаттарды чыгарып кетиш үчүн түзүлгөн «Акнетке» байланыштуу компания деп эсептейт.

ИИМдин маалыматына караганда, социалдык төлөмдөрдөн жана салык төлөөдөн качуу фактысы боюнча сегиз кылмыш иши козголгон. Буга чейин Экономикалык кылмыштарга каршы күрөш боюнча мамлекеттик кызмат (Финполиция) «Акнетке» каршы Жазык кодексинин 233-беренесинин 1-бөлүмү («Коммерциялык же башка уюмда ыйгарым укуктарын кыянаттык менен пайдалануу»), 232-беренесинин 2-бөлүмү («Уюмдардын бюджетке салыкты жана (же) башка милдеттүү төлөмдөрдү төлөөдөн качышы»), 253-беренесинин 2-бөлүмү («Куралды, ок-дарыларды мыйзамсыз жүгүртүү») жана 337-беренеси («Тергөөчүнүн ишине тоскоолдук кылуу») менен иш козголгонун кабарлаган.

Аталган мекеме тараткан маалыматта айтылгандай, «Акнет» ишканасына байланыштуу кылмыш иши анын акционеринин арызы боюнча козголгон. Арыз ээси компания анын үлүшүн азайтып, дивиденд төлөөдөн баш тартканын, мамлекетке салык жана социалдык төлөмдөрдү аз төлөп жатканын билдирген.

«Акнет» компаниясынын негиздөөчүлөрү катары Кубан Ажимудинов, Аскар Кутанов жана Руслан Абдумажитов деген жарандар катталган. Буга чейин аткаруучу директор болуп келген Руслан Абдумажитов менен Кубан Ажимудиновдун ортосунда үлүш ээлиги жана кирешени бөлүү боюнча келишпестик чыккан. Былтыр 2018-жылы 19-ноябрда Финансы полициясы Руслан Абдумажитовдун арызы боюнча кылмыш ишин козгогон.

15-апрель күнү Башкы прокуратура Финансы полициясынын тергөө бөлүмү кыскарткан беш кылмыш ишин кайра жандантып, аны иликтөөнү 28-мартта ИИМдин Тергөө кызматына өткөрүп берген.

www.