1,275 Бардыгы /

Өзбекстандын Анжиян облусундагы мектептердин мугалимдери битир-садага катары «Вакф» деген кайрымдуулук фондго акча которууга мажбурланып жатышат.

Мугалимдердин айтымында, аларды айлыгынан 50 000 сумдан (алты доллар) битир-садага берүүгө макулмун деген кагаздарга кол коюуга мажбурлап жатышат.

«Ар бирибизге банк эсептери жазылган кагаздарды берип, «беш миң сум» деп жазып, кол коюп берүүгө мажбурлап жатышат. Биз битир-садаганы жакыр адамдарга өзүбүз беребиз десек дагы макул болушкан жок. Азыр биздеги мугалимдердин бардыгы кол коюп беришти», — деди Анжиян районундагы №5 мектептин мугалими.

Аталган райондогу мектептердин биринин директору мындай тапшырма облустук билим берүү башкармалыгы тарабынан берилгенин билдирди. «Облустук билим берүү башкармалыгынан райондук башкармалыкка, андан мектеп директорлоруна айтышты. Директорлор болсо бул ишке жооптуу кылып орун басарларынын бирин бекитип, кол коюлган кагаздарды бухгалтерияга тапшыртып жатышат. Мындай көрүнүш азыр бардык мектептерде болуп жатат», — деди директор.

«Вакф» кайрымдуулук фондунун өкүлү бул жергиликтүү чиновниктердин демилгеси экеин, фонддун жетекчилиги бул боюнча эч кандай көрсөтмө бербегендигин билдирди.

Облустагы имамдардын бири битир-садага чогултуу өнөктүгү бардык райондордо жүрүп жатканын айтты. «Бул Анжиян районунда гана эмес, облустагы бардык райондордо болуп жатат. Бир нече күн мурда облус башчысы баарыбызды чогултуп, тапшырма берген. Мектептерде 50 миң сумдан, башка мекеме кызматкерлери андан көбүрөөк акча берип жатышат. Бирок адамдар битир-садага катары алынып жаткан бул каражат муктаж адамдарга жетпейт деп, нааразы болуп жатышат. Анткени кечээ бир аялга үй берип, бирок президент кеткенден кийин кайра чыгарып салышыптыр. Азыр адамдар эч нерсеге ишенбей калды», — деди имам.

Быйыл апрелде «Вакф» кайрымдуулук фондунун төрагасы кызматтык унаа катары Өзбекстанда өндүрүлгөн эң кымбат «Малибу-2» үлгүсүндөгү машине сатып алганы кабарланган. Анда фонд жетекчиси бул автоунаа чет өлкөлүк меймандарды тосуп алуу үчүн алынганын айткан.

www.