1,649 Бардыгы /

НЬЮ-ДЕЛИ. Кыргыз Республикасынын Президенти Сооронбай Жээнбеков Индия Республикасына жасаган иш сапарынын алкагында Индиянын Премьер-министри Нарендра Моди менен жолугушту. Анткени, Мамлекет башчысы Индияга Нарендра Модинин чакыруусуна ылайык анын ант берүү аземине катышуу үчүн келген.

            Сооронбай Жээнбеков адегенде Нарендра Модини «Бхаратия Джаната парти» партиясынын парламенттик шайлоодогу ишенимдү жеңиши жана Нарендра Модинин Индиянын Премьер-министри болуп кайра шайланышы менен чын ыкластан куттуктады.

            – Шайлоолордун жыйынтыгы Сиз жүргүзгөн олуттуу реформаларга жана аткарып жаткан маанилүү иш-чараларга Индия элинин көрсөткөн чоң ишенимин гана далилдеди. Кыргызстан менен Индиянын ортосундагы достук жана өз ара ишенимдүү кызматташтык мындан ары дагы үзгүлтүскүз бекемделет деген терең ишеничтемин! — деди Сооронбай Жээнбеков.

            Сооронбай Жээнбеков Нарендра Модинин Кыргызстанда жакындагы расмий сапарын чыдамсыздык менен күтүп жатышкандыгын айтып, бул сапар жогорку деңгээлде, жемиштүү жана ийгиликтүү өтөөрүнө ишендигин кошумчалады. Ал эми Нарендра Моди куттуктоолору үчүн терең ыраазычылык билдирип, Кыргызстан жана Индия ар тараптуу кызматташуунун көп жылдык мамилелерине ээ дос өлкөлөр экендигин баса белгиледи. Ал Индия тарап Кыргызстан менен ар тараптуу мамилелердин мындан аркы өнүгүүсүнө дагы абдан кызыкдар экендигин жашырган жок.

            Президент Сооронбай Жээнбеков жана Премьер-министр Нарендра Моди эки тараптуу жана Эл аралык уюмдардын алкагында кызматташтыктын кеңири өңүтү боюнча маселелерди дагы ачык-айкын талкуулашты.

                        Алишер ТОКСОНБАЕВ, өз кабарчы