1,457 Бардыгы /

Бул тууралуу Орусиянын Эсеп палатасынын башчысы жана мурдагы каржы министри Алексей Кудрин бүгүн Петербургда ачылган эл аралык экономикалык форумда билдирди.

Ал Baring Vostok фондунун негиздөөчүсү, америкалык ишкер Майкл Калвинин камалышын «экономика үчүн шок» деп атап, жыл башынан бери 40 миллиард долларга жеткен өлкөдөн чыгып кетип жаткан капиталды эки эсеге көбөйткөнүн билдирди.

Кудрин Кремлдин америкалык ишкер тууралуу билдирүүсүнөн кийин анын үй камагында жатышын таң калыштуу көрүнүш деп атады. Кремль Калвини Петербургдагы бул экономикалык форумда көргүсү келээрин буга чейин Орусия президентинин басма сөз катчысы Дмитрий Песков билдирген. Анда ал Калвини «15 жылдан ашык убакыттан бери орусиялык базарда иштеген активдүү оюнчу, ишенимдүү ишкер» катары мүнөздөгөн.

31-майда Калвинин адвокаттары үй камагында жаткан ишкердин Петербургдагы форумга катышуусуна уруксат берүү өтүнүчү менен Орусиянын Тергөө комитетине кайрылышкан.

​Буга чейин Калвинин кармалгандыгына байланыштуу АКШ Петербургдагы эл аралык экономикалык форумга өкмөттүк делегациясын жөнөтпөй турганын билдирген. Мындан тышкары Петербургга Кошмо Штаттардын Орусиядагы элчиси Жон Ханстман дагы барбай турганы кабарланган.

Быйыл Петербург эл аралык экономикалык форуму 6-7-июнь күндөрү өтөт.

Майкл Калви быйыл февралдын ортосунда камакка алынган. Тергөөчүлөр ал «Восточный» банкынан 2,5 миллиард доллар чыгаруу үчүн мыйзамсыз схема түзгөн деп эсептешет. Калви дооматтарды четке кагып, өзүнө тагылган айыптоолорду карандай калп деп атоодо. Ал иштин артында сөз болгон банктын директорлор кеңешинин мүчөсү Шерзод Юсупов жана дагы бир акционер Артем Аветисян менен кооперативдик талаш турат деп эсептейт.

www.