1,175 Бардыгы /

Тажикстан парламентинин жогорку палатасынын спикери Махмадсаид Убайдуллоев грек-рим күрөшү боюнча спорт чебери Сергей Чуевдин өлтүрүлүшүнө шектелген тажик мигранттарынын кордолушу боюнча комментарий берди. Трагедия 8-июнда Москванын парктарынын биринде болгон.

Ал жогорку палатанын жыйынында «Ар бир кылмыш мыйзам чегинде, адам укуктарын сактоо менен жүргүзүлүшү керек. Шектелгендердин ар-намысына доо келтирүүгө болбойт», – деди.

Тажикстан бийлиги бул маселе боюнча биринчи жолу расмий түрдө пикирин билдирүүдө. Буга чейин киши өлтүрүүгө шектелген тажик мигранттарынын айрык шым, ич кийимчен сүрөттөрү тараган. Социалдык түйүндөрдүн колдонуучулары кармалгандардын кордолушуна нааразы болушкан.

Махмадсаид Убайдуллоев Тажикстандын Москвадагы элчилиги окуянын өнүгүшүгө көз салып жатканын кошумчалады.

8-июнда Москвада грек-рим күрөшү боюнча спорттун чебери Сергей Чуевдин өлүмүнө шектелип Тажикстандын алты жараны кармалган.

Алгач орусиялык ЖМКлар 34 жаштагы Сергей Чуев ишембиге оогон түнү Москвада кош бойлуу келинди бейбаштардан коргоо маалында өлтүрүлгөнүн кабарлашкан. Бирок Орусиянын Тергөө комитети бул маалыматты четке кагып, спортчу топтошкон адамдар жолдон өткөрбөй жаткан эки өспүрүмгө жардам берип жатканда сабалганын билдирген.

Москвадагы Тажик маданий борборунун төрайымы Хуршед Хамрокулова кармалгандарга карата мындай кемсинтип мамиле кылуу туура эмес деп эсептейт. Анын айтымында, азырынча мигранттардын күнөөсү далилдене элек жана аларды эч ким кемсинтип, мазактоого акысы жок.

www.