2,116 Бардыгы /

Кыргызстанда мал чарбасы үчүн 55 миллион долларлык долбоор башталды. Анын ичинде кайтарымсыз гранттар жана 3-5 пайыздык үстөгү менен жеңилдетилген насыялар бар. “Рынокко чыгууну камсыздоо” долбоорунун координатору  Мирлан Айтказиев бүгүн Өкмөттүн Жалал-Абад областындагы өкүлчүлүгүндө жергиликтүү бийлик өкүлдөрүнө жана дыйкан-фермерлерге толук маалымат берди. Эт, сүт, жүн жана бал өндүрүү багытындагы долбоордун жалпы бюджети 55,4 миллион долларды түзөт. Анын ичинен 20 миллион доллары Кыргыз-Орус өнүктүрүү банкы тарабынан жеңилдетилген насыя түрүндө берилет. Ошондой эле, 7,5 миллион доллар дыйкан фермерлерге грант түрүндө, ошондой эле миллион доллар инновациялык технологияларды алууга берилет. Гранттар 50 пайыздык өздүк салым менен берилет, эгерде фермердин 200 миң долларга чейинки кичи долбоорлору болсо, жүз миң доллар грант берилет. Ал эми негизги шарттардын бири жаңы иш баштагандар эмес. Буга чейин иштеп келген фермерлер гана катыша алат. Бир нече фермерлер  биригип ортодо кредит алышса да болот. Анткени жеңилдетилген кредиттерди доллар менен алса 3-5 пайыз, сом менен алса 6-8 пайыздык үстөк болот. Долбоор мал чарбасынын продукциясын эл аралык рынокко чыгаруу максатында ишке ашып жатат. Региондордогу дыйкан-фермерлер аталган маалыматты уккан күндөн тарта жергиликтүү бийлик өкүлдөрүнөн  жана агрардык өнүктүрүү бөлүмдөрүнө кайрылып кошумча маалыматтард алып катыша алышат.