1,030 Бардыгы /

            ОШ. Ош Эл аралык аэропортун жылдыруу маселеси көп жылдардан бери айтылып келатат. Акыркы кезде бул иш активдеше баштады. Ош облустук акимчлигинен кабарлашкандай, аба майданды курууга Түркия жана Кытай мамлекеттери абдан кызыгып жатышат.

            Ошентип, Кытайдын “Бир алкак – бир жол” ири долбоорунун туруктуу комитетинин төрагасы Ге Чжили Кыргыз Өкмөтүнүн Ош облусундагы ыйгарым укуктуу өкүлү Узарбек Жылкыбаев менен жолугушуп, аба майданын курууга даяр экендиктерин билдирди. Ал эми ушул эле жылдын башында Түркия тарап дагы каржылоо ниетин ачыктаган эле. Азырынча Кыргыз тарап кимге токтолоору белгисиз. Бирок, жаңы аба майданын куруу үчүн  Өкмөттүк жана жергиликтүү деңгээлдеги пландоо, анализдөө иштери аягына чыгып калды. Ошондой эле Кыргыз Өкмөтү аэропорт салына турган 500 гектар жерди трасформациялоо ишин дагы бүтөөрү күтүлүүдө.       

            Мурда маалымдалгандай, аба ырайы бузулганда эле, аталган аэропорттун аймагын туман каптап, учактар токтоп калып, жүрүгүнчүлөргө олутту ыңгайсыздыктарды жаратып келатат. Ал эми жаңысы түшөт делген Кара-Суу районунун Мады айылы тарабында андай болбойт, анткени, ал жак кайрак болгондуктан, туман көп каптабайт деп убада кылып жатышат. Ал эми Оштун жаңы аба майданын куруу аракети жүрүп жатканы менен, азыркы майданда дагы деле реконструкция иштери бүтө элек. Маселен, учуп жаткандарды узатууга келгендер үчүн атайын жай курулуп, учуп-конуу тилкелери узартылды жана миллиондогон каражаттарга заманбап жаңыртылды.

            Ош Эл аралык аба майданынан борбор калаабызга жана башка чет мамлекеттерге күн сайын он беш учак каттамга чыгып турат.

                        Алишер ТОКСОНБАЕВ, өз кабарчы