2,079 Бардыгы /

            ОШ. Ош облусунда жаш өспүрүмдөрдүн коопсуздугу үчүн “Сууда сүзүүнү алдын алуу” рейди башталды. Анда жашы жете элек балдардын жана алардын ата-энелеринин арасында түшүндүрүү жараяны жүргүзүлүп, чоң-чоң каналдарда жана бассейндерде ойноп жүрүшкөн балдарга бир катар эскертүүлөр берилди.

– Балдардын өмүрүнө коркунуч туулбасын, сууга чөгүп каза тапкандардын саны азайсын деген максатта ушул рейдди уюштурдук. Бул саамалык жай мезгилинде тынымсыз өткөрүлүп турат. Ошондой эле кооптуу делген жерлерге атайын белгилерди орнотууну дагы уланып жатабыз. Мындай чаралар Ош облусунда гана эмес, бардык аймактарда жүргүзүлөт. Ата-энелерге дагы түшүндүрүп, балдарын таптакыр кароосуз калтырбоосун улум-улам эскертип жатабыз! – дейт билдирди  Ош облустук ички иштер башкармалыгынын жашы жете электер арасында укук бузуулардын алдын алуу борборунун башчысы Фарида Шананова.

            Айтмакчы, үстүбүздөгү жылдын алты айында сууга чөгүп каза тапкан өспүрүмдөрдүн саны Ош облусунун аймагында сегизди чапчыды. Мунун ичинен беш бала Кара-Суу районунда, Ноокат районунда  бир бала, Өзгөн районунда 2 бала каза тапкан. Булардын эң улуусу 2003-жылы туулган, а эң кенжеси  2018-жылы төрөлгөн.

                        Алишер ТОКСОНБАЕВ, өз кабарчы