860 Бардыгы /

ТАЖИКСТАН: ВОРУХ-ИСФАРА ЖОЛУН РЕКОНСТРУКЦИЯЛОО ИШТЕРИ УЛАНУУДА

Тажикстанда Ворух-Исфара унаа жолунун кыргыз чек арасына жакын бөлүгүндө реконструкциялоо иштери уланууда. Бул тууралуу Согди облусунун башчысы Ражаббой Ахмадзода билдирди.

Анын айтымында, бул жерде беш чакырым жолго асфальт төшөө каралууда. «Эч кандай маселе жок, иштер график боюнча уланып жатат», — деди облус башчысы.

Ал жолду реконструкциялоого чек арага жакын жашаган кыргыз жарандары тоскоолдук кылып жаткандыгы тууралуу маалыматтарды четке какты. «Акыркы үч күндөн бери кыргыз-тажик чек арасында кайрадан чек ара жаңжалдары чыккандыгы кабарланган. Мындан улам орун басарымды чек арадагы абал менен таанышып кел деп жөнөткөм. Ал бардыгы тынч, тынчсызданууга эч кандай негиз жок экенин билдирди», — деди Ахмадзода.

Бир нече күн мурда Исфара акимчилиги Баткен облусунун Ак-Сай айылынын тургундары Исфара-Ворух жолун оңдоого тоскоолдук кылып жатканын билдирген. Анда кыргыз жарандары оңдоо иштери жолдун тактала элек аймакгында жүрүп жатканын айтып, нааразы болгону кабарланган. Бирок тажик тарап реконструкция иштери Тажикстандын аймагында гана жүрүп жатканын билдирүүдө.

Ал ортодо Исфара шаарында Согди жана Баткен облустарынын жетекчилери ортосунда Ворух-Исфара жолун реконструкциялоо боюнча сүйлөшүүлөр уланып жатат.

Кыргыз-тажик чек арасынын узундугу 970 чакырымды түзөт. Анын 519 чакырымы такталса, калган тилкелери тактала элек. Мындан улам аларда суу, жайыт жана жерге байланыштуу эки өлкө жарандары ортосунда жаңжалдар чыгып турат.

www.