2,702 Бардыгы /

“Жаштар үчүн чек ара жок!” аталышындагы жаштар фестивалынын кезегин Жалал-Абад уюштуруп, бүгүн ачылуу аземи өттү. Бул фестиваль буга чейин Фергана жана Ош областтарында өткөн.

20-22-июнь күндөр аралыгында өтүүчү бул фестивалга чек арага жакын областтардын жаштарынын лидерлери Өзбекстандын Андижан, Наманган, Фергана областтарынан жана Ош, Баткен жана Жалал-Абад областтарынын жер-жерлеринен келген жаш активисттер, жергиликтүү өз алдынча башкаруу органдары, Эл аралык уюмдардын өкүлдөрү катышууда.

 “Биз Өзбекстан менен акыркы жылдары карым-катнашыбыз бир топ жакшырып, бир канча жолугушууларды, ар түрдүү иш-чараларды биргеликте уюштуруп келүүдөбүз. Эми биз мынтип жаштардын достугун бекемдеп, бири-бири менен карым-катышы күчөсүн деген максатта жаштардын фестивалын уюштуруп жатабыз. Бул фестиваль үчүнчү ирет өтүп жатат. Буга чейин Фергана жана Ош областтарында өткөн. “Жаштар үчүн чек ара жок!” фестивалы чек арага жакын аймактардын арасында өтүп жатат. Бүгүнкү иш-чаранын алкагында жаштар кичи тайпаларга бөлүнүп, жаштарга тиешелүү багыттар арасында пикир алмашуулар жүрөт. Жыйынтыгында баары чогулушуп, биргеликте кандай иш-чараларды уюштурууга болорун талкуулашат. Ал эми эртең Токтогул районунда улантылып, кызыктуу иш-чаралар коштомокчу” – дейт М.Акматов Өкмөттүн Жалал-Абаддагы өкүлүнүн орун басары.

“Жаштар үчүн чек ара жок!” аталышындагы фестивалга коңшу өлкөдөн 30 адамдан турган делегация келип, пикир алмашып, тажрыйба бөлүшмөкчү.

“Бул фестивалга Өзбекстандан 30 адамдан турган делегация келдик. Мында келген жаштар спорт, маданият, билим тармактарынын эң алдыңкылары десек болот. Өтүп жаткан бул фестивалда эки тараптын тең жаштары бири-биринин мыкты жактарынан өрнөк алып, келечекте жакшы иш-чараларды биргеликте өткөрөбүз деген жакшы ниетте келдик. Эки мамлекеттин ортосундагы алып барылып жаткан ар тараптуу байланышты мына ушул жаштардын катышуусунда болуп жатканы баарыбызды кубантат. Бизди жылуу мамиледе тосуп алган кыргыз элине жана досторубузга терең ыраазычылыгыбызды билдиребиз ” – дейт, Элербек Матисаков Андижан областынан келген өкүл.

Кошумчалай кетсек, аталган фестиваль 21-22-июнь күндөрү Токтогул районунда улантылып, ар түрдүү спорттук иш-чаралар, сувенирлерди кийизден, чий сокмо менен жасоону үйрөтүүчү мастер-класстар, улуттук буюмдардын жана тамак-аштардын көргөзмөсү коюлуп, Токтогул атындагы музейге жана Т.Сатылгановдун үй-музейине экскурсия уюштурулмакчы.

Бүбүсара ОРОЗАЛИЕВА, “Аймак”