Түркиянын Стамбул шаарында жекшембиде өткөн мэр шайлоонун баштапкы жыйынтыгына ылайык, оппозициядагы Элдик-республикалык партиянын талапкери Экрем Имамоглу бюллетендердин 95% саналып бүткөндөн кийин добуштардын 53% ашыгын алды. Башкаруучу партия талапкеринин айтымында, шайлоо түрк демократиясынын кынтыксыз экенин далилдеди.

Президент Режеп Тайып Эрдоган жетектеген Адилеттүүлүк жана өнүгүү партиянын өкүлү, мурдагы премьер-министр Бинали Йылдырым 45 пайыздын тегерегинде добуш топтоду.

Быйыл 31-марттагы мэр шайлоодо 2002-жылдан бери бул шаарды башкарып келген Адилеттүүлүк жана өнүгүү партиясынын талапкери утулуп, оппозициянын өкүлү Экрем Имамоглу жеңүүчү деп жарыяланган. Ал Йылдырымдан 15 миң добушту көп алып, 18-апрелде кызматына киришкен.

Бирок башкаруучу партия добуш берүүдө бурмалоолорго жол берилген деген жүйө менен кайра шайлоо өткөрүүнү талап кылган.