911 Бардыгы /

Кошмо Штаттар 2017-жылы орус өкмөтүнүн аппаратында иштеген тыңчысын Орусиядан жашыруун түрдө алып чыгып кеткен. Бул тууралуу CNN телеканалы Дональд Трамптын администрациясындагы өз булактарына таянуу менен билдирди.

Мындай чечим кабыл алууга түздөн-түз тиешеси бар өз булактардын биринин айтымында, Трамптын айланасындагы айрым кишилердин жашыруун маалыматтар менен иштөөдөгү кесипкөйлүгүнүн күмөн жаратышы тыңчыны Орусиядан алып кетүүгө түрткү болгон. CNN америкалык тыңчынын ачыкка чыгып калуу коркунучун жараткан кемчиликтерге бир нече сапар жол берилгенин ырастоодо.

Тыңчыны алып чыгып кетүү чечими 2017-жылы май айында, Трамп Орусия тышкы иштер министри Сергей Лавров жана Орусиянын АКШдагы ошол кездеги элчиси Сергей Кисляк менен жолугушкандан кийин кабыл алынган.

Ал кезде Борбордук чалгын башкармалыгынын директору Майк Помпео болгон. Ал Трамптын администрациясында иштеген кишилер менен маектешкенден кийин Москвадагы булактан алган көптөгөн маалыматтарды алар менен талкуулоо опурталдуу деп эсептеген. Жашыруун агентти алып чыгып кетүү аргасыз кадам болгон.

АКШнын мамлекеттик катчысынын өкүлү бул боюнча комментарий берүүдөн баш тартты. Ак үйдүн басма сөз катчысы Стефани Гришам: “CNN телеканалынын билдирүүсү жаңылыш гана эмес, кишилердин өмүрүнө коркунуч туудурушу да мүмкүн”, – деди.

www.