739 Бардыгы /

БИШКЕК. Президент Сооронбай Жээнбеков Жапониянын Кыргызстандагы Элчиси Есихиро Ямамураны дипломатиялык вазийпасынын аяктагандыгына байланыштуу кабыл алды.

Мамлекет башчысы адегенде Жапониянын Элчисине өз ара ишеним жана урматтоого негизделген Кыргыз-Жапон мамилелерин өнүктүрүүгө кошкон жеке салымы үчүн терең ыраазычылыгын билдирди: – Кыргызстан Жапония менен болгон ар тараптуу кызматташтыкты өнүктүрүүгө өзгөчө мани берет. Бул жылдары биз өз ара пайдалуу кызматташууну бекемдеп, кеңейте гана алдык. Жапония Кыргызстанга демократиялык баалуулуктарды жылдыруу максатында гранттык, кредиттик жана техникалык жардамдарды үзгүлтүксүз берип келатат. Кыргызстан элинин атынан терең ыраазычылык гана билдирем!

Ал эми Жапониянын Элчиси Есихиро Ямамура Президентке жылуу кабыл алуусу үчүн чоң ыраызычылыгын билдирип, анын Кыргызстандагы вазийпасын өтөгөн жылдары кыргызстандыктардын жана мамлекеттик бийликтин колдоосун жана жакшы мамилесин сезгендигин баса белгиледи. Ошондой эле Элчилик кызматында аткарган жумушу тууралуу дагы кыскача баян этти. JICA Жапон эл аралык кызматташуу Агенттигинин «Бир айыл — бир азык» долбоору эми Ысык-Көл облусунда гана эмес, өлкөнүн бардык облустарында ийгиликтүү ишке ашырылып жаткандыгына токтолду.

Соңунда Президент Сооронбай Жээнбеков жана Элчи Есихиро Ямамура өлкөлөр ортосундагы саясий, соода-экономикалык, парламентер аралык, дипломатиялык, социалдык-экономикалык жана маданий-гуманитардык кызматташуу маселелерин дагы кенен-чонон талкуулашты.

Алишер ТОКСОНБАЕВ, өз кабарчы