708 Бардыгы /

Хатлон облустук прокуратурасы Бохтардагы орус аскер базасынын эки жоокерине кол салууга шектелген тажикстандык жигитти психиатриялык текшерүүгө жөнөттү.

Расмий маалыматтар боюнча шектүү – 21 жаштагы Вахш районун тургуну Ахлиддин Абдуллоев.

Орусиянын Тажикстандагы элчилиги бул окуяны тыкыр көзөмөлдөп жатканын маалымдады.

«Азаттыктын» тажик кызматынын облустук прокуратурадагы өз булагы шектүү кармалганын, анын психиатриялык саламаттыгы текшерилип жатканын билдирди:

– Жаш жигит психикалык оору менен жабыркайт. Биз аны коомдон обочо тутуп, мажбурлап дарылатууга жөнөтүшүбүз керек. Бирок анын алдында оорусунун деңгээлин аныктоого тийишпиз. Биз орус аскердик базасы менен өз ара аракеттенишип жатабыз.

Анын айтымында, кол салууга кабылган орусиялык аскерлер жеңил жаракат алыган.

Тажикстан ИИМинин маалымат катчысы Умаржон Эмомали окуя 20-сентябрда болгонун билдирди. Министрлик кол салууну «бейбаштык», кол салуучуну «психикалык жактан оорулуу» деп атады.

Бул арада ТАСС агенттиги орусиялык эки аскер кызматкери Душанбеде ооруканага жаткырылганын, алардын абалы туруктуу экенин жазды.

www.