978 Бардыгы /

Түркмөнстандын Аваз туристтик аймагында кыз-келиндерге сууда сүзүүчү кийим менен деңизге түшүүгө тыюу салынды. “Азаттыктын” түркмөн кызматы билдиргендей, эрежеге баш ийбегендерге 200 манат –расмий курс боюнча 55 доллар айып пул салынат.

Маалыматка караганда, жээкте аялдардын дресс-кодуна полиция көзөмөл жүргүзүүдө. Чектөөлөр мурда деле болуп келген, бирок айып пул салынчу эмес.

Аялдар сууга көйнөкчөн түшүп, сууда сүзүүдө тоскоолдук жаралып жатканына даттанышууда. Айрым кыз-келиндер жаңы эрежеге байланыштуу бул жылы Түркмөнстандын башкы курорттук зонасына келүүдөн баш тартышкан.

Аваз улуттук туристтик зонасы Түркмөнбашы шаарынан он эки чакырым аралыкта жайгашкан. Бул Гурбангулы Бердымухамедов бийликке келгенден берки иш жүзүнө ашкан эң негизги долбоорлордун бири болуп эсептелет. Ага миллиарддаган доллар каражат жумшалган. Кымбат болгондуктан түркмөнстандыктардын баары эле келип эс ала алышпайт, чет өлкөлүк туристтер болсо аз. Көптөгөн мейманканалар жыл бою бош турат.

www.