1,140 Бардыгы /

10 миллион сомго оңдоп түзөөдөн өткөрүлгөн Кербен аэропорту колдонууга дагы деле даяр эмес. Алгач үстүбүздөгү жылдын май айында иштей баштайт делген менен ремонт иштери кечиккен. Андан соң август айында аэропорттун ачылышына премьер министр Мухаммедкалый Абылгазиев өзү катышкан. Ачылышы болгон менен колдонууга толук даяр болбогондуктан алигече иштеп баштай элек.

Жогорку кеңештин Транспорт, коммуникациялар, архитектура жана курулуш боюнча комитетинин жыйынында «Кербен» аэропортун ишке киргизүү тууралуу» токтомунун аткарылышы тууралуу маалымат угулду. Бул тууралуу жогорку кеңештин басма сөз кызматы жазып чыкты.

Жарандык авиация агенттигинин директору Курманбек Акышевдин берген маалыматы боюнча бүгүнкү күндө аэропорттун имаратын оӊдоп-түзөө толугу менен жыйынтыкталып, тиешелүү аэронавигациялык жабдуулар алынган. «Кербен» аэропортуна Жарандык авиация агенттиги тарабынан тиешелүү сертификат берилген. «Аэропорттун инфратүзүмү учуп-конуу тилкесинен башкасы белгиленген эрежелерге ылайык келет. Тилкеден кеткен жаракалар мастика чайыры менен бүтөлүп герметизацияланышы керек. Биз бул эреже бузуулар четтетилиши керек деген шарт менен сертификат бергенбиз»,- дейт К.Акышев.

Талкууда депутат Сайдолимжон Жураев аталган агенттиктин мындай чечимине таӊгалгандыгын билдирди. «Алгач эскертүү берип, андан кийин эреже бузуулар четтетилген соӊ колдонууга жарактуу деген сертификат берилиши керек»,- дейт С.Жураев.

Депутат Калдарбек Баймуратов болсо тиешелүү аткаруу бийлигинин өкүлдөрүнөн «Кербен» авиакаттамы качан иштеп баштаарына кызыкты. Баяндамачылар тилкени оӊдоп-түзөө бир аптадай убакыт алаарын, ал эми авиакаттам жүргүзүү чечимин авиакомпаниялардын өздөрү кабыл алышаарын белгилешти.

Депутат Алтынбек Жунус уулу обьектинин курулушун учуп-конуу тилкесиндеги ремонт иштеринен улам создуктурууга жол берилбеши керектигине токтолду. «Бул «Манас» аэропортунун жетекчилигинин канааттандыралык эмес ишинин ачык мисалы. Ишке принципиалдуу мамиле кылуу менен тилкедеги ремонт иштерин бир апта ичинде бүтүрүп койсо болот. Элдин суроо-талабын ар дайым эсибизден чыгарбашыбыз зарыл. Аксы, Ала-Бука жана Чаткал райондорунун, Таш-Көмүр шаарынын эли бул аэропорттун иштешин чыдамсыздык менен күтүп жатышат»,- дейт депутат. Ошондой эле А.Жунус уулу иш дагы да кечеӊдей турган болсо аэропорттун жетекчилигинин жоопкерчилигин кароону сунуш кылды.

Транспорт, коммуникациялар, архитектура жана курулуш боюнча комитетининин төрайымынын орун басары Алмазбек Эргешов «Кербен» аэропортунун ишке кирбей турушу авиация тармагын өнүктүрүү саясатына жооптуу болгон Транспорт жана жол министрлигинин кайдыгер мамилесинен улам болуп жатканын айтты. «КР Премьер-министри өзү барып «Кербен» аэропотунун ачылышына катышкан. Бул тууралуу бир канча күн телеканалдарда жаӊылыктар берилген. Элде бул аэропрттон самолеттор учуп, каттам жүргүзүлүп жатат деген түшүнүк калган», -деди А.Эргешов.

Талкуудан кийин комитет мүчөлөрү берилген маалыматты эске алуу менен тиешелүү министрлик менен мекемелерге «Кербен» аэропортун колдонууга берүүнү ыкчамдатууну тапшырышты.