669 Бардыгы /

БИШКЕК. Кыргыз Республикасынын Президенти Сооронбай Жээнбеков Жогорку соттун төрайымы Гүлбара Калиева менен жолугушту. Анда өлкөбүздөгү сот системасын мындан ары жакшыртуу, сот-укуктук реформаны ишке ашыруунун жүрүшү боюнча чаралар ачык-айкын талкууланды.

Мамлекет башчысы сот-укуктук реформаны жүзөгө ашыруу, коррупцияга каршы мамлекеттик саясатты ырааттуу түрдө жүргүзүү жана сот акыйкаттыгын толук кандуу камсыз кылуу аркылуу жарандардын укуктарын жана эркиндигин коргоодо сот органдарынын ролу өзгөчө экендигин баса белгиледи. Президент Сооронбай Жээнбеков ошондой эле калктын сот системасына болгон ишенимин бекемдөө,аброюн жакшыртуу жана коомчулук менен байланышты жөнгө салуунун өзгөчө зарылчылыгына дагы токтолду.

-Жүрүп жаткан реформалардын түпкү максаты өлкөбүздө адилеттүү жана таза сот-укуктук системаны куру болуп саналат, —деп баса белгиледи Мамлекет башчысы.

Өз кезегинде Жогорку соттун төрайымы Гүлбара Калиева «2019-2022-жылдарга Кыргыз Республикасынын сот тутумун өнүктүрүү» Мамлекеттик максаттуу Программасынын негизги багыттары жана ишке ашыруу чаралары жөнүндө маалымат берди. Ал аталган Программа биринчи кезекте өз алдынча жана көз карандысыз сот бийлигин түзүү, жарандардын укуктары жана эркиндиктерин сотто коргоо кепилдигин камсыздоо, адилеттүү соттун жеткиликтүүлүгүн, натыйжалуулугун жана сапатын жогорулатууга багытталганын белгиледи.

Соңунда судьялар курамын окутуу жана ар дайым кесиптик квалификациясын жогорулатуу, алардын ишмердигинин натыйжалуулугу жана ачыктыгы, сот коллегияларынын курамын максаттуу бөлүштүрүү жана сот органдарынын материалдык-техникалык камсыздалышын жакшыртуунун маанилүүлүгү дагы айтылды.

Алишер ТОКСОНБАЕВ, өз кабарчы