627 Бардыгы /

ЫСЫК-КӨЛ. «Коррупцияга каршы күрөштөн түшкөн акча каражаттарын эми аймактардагы авариялык мектептерди оңдоого жумшайбыз», —деп убадалады Кыргыз Республикасынын Президенти Сооронбай Жээнбеков Ысык-Көл облусунун Жети-Өгүз районунун жашоочулары менен жолугушуусунда.

Сооронбай Жээнбеков коррупцияга каршы күрөштөн түшкөн акча каражаттары үчүн Бирдиктүү депозиттик эсеп ачылгандыгын, булл  акча каражатынын эсебинен Бишкек шаарында 7, Чүй облусунда 7, Ош шаарында 1  —окуучулар батпай жаткан жалпы 15мектепке кошумча корпустарды куру иштери башталгандыгын эске салды.

-Ички миграциянын айынан Чүйдө жана Бишкекте калктын тынымсыз көбөйүшүнөн улам мектептер жетишпей, ушундай чечим чыккан. Эми бирдиктүү депозиттик эсептин акча каражаттарын республиканын аймактарындагы башка авариялык абалдагы мектептерди оңдоп-түзөөгө, жаңы мектептерди жана кошумча корпустарды курууга жумшалат, — деп баса белгиледи Сооронбай Жээнбеков.

Ошентип, мамлекет башчысы эске салгандай, республикабыз боюнча бардыгы болуп 198 мектеп авариялык абалда. Мунун ичинен Ысык-Көл облусунда 24 мектеп, Жети-Өгүз районунда 4 авариялык абалдагы мектеп бар. Быйыл республика боюнча 6 авариялык мектептерде курулуш иштери башталат, октябрь айында Жети-Өгүз районунун Дархан айылына мектеп курула баштайт. Ысык-Көл облусунун калган 18 авариялык мектептеринде дагы курулуш иштери жүргүзүлөт.

Алишер ТОКСОНБАЕВ, өз кабарчы