922 Бардыгы /

АКШнын президенти Дональд Трамп ага импичмент жарыялоо боюнча башталган тергөө иштерин «төңкөрүш аракети» деп атады.

Тергөө жүргүзүүнү сентябрдын аягында АКШ Конгрессинин Өкүлдөр палатасы демилгелеген. Буга Дональд Трамп менен Украинанын президенти Владимир Зеленскийдин 25-июлдагы телефондук сүйлөшүүсү себеп болгон. Ал сүйлөшүүнүн мазмуну тууралуу чалгын кызматынын өкүлү өз жетекчилигине билдирген.

Ак үй сентябрдын аягында телефондук сүйлөшүүнүн стенограммасын жарыялаган. Ага ылайык, Трамп Зеленскийден Украинада мурдагы вице-президент Жо Байдендин уулуна карата тергөө иштерин баштоону өтүнгөн. Трамптын айтымында, Байдендин уулунун бул өлкөдөгү коррупциялык иштерге тиешеси бар. Конгрессмен-демократтар президент 2020-жылы өтө турган президенттик шайлоодогу ыктымал атаандашына карата компромат алууга аракет кылып, өзүнүн ыйгарым укуктарын ашыкча пайдаланганын билдиришүүдө.

Тергөөнүн алкагында Өкүлдөр палатасы көрсөтмө берүү үчүн Конгресске Мамлекеттик департаменттин бир нече кызматкерин, анын ичинде мамлекеттик катчы Майк Помпеону чакырган. Мындан тышкары чакырылгандардын арасында АКШнын Украина боюнча мурдагы атайын өкүлү Курт Волкер менен Кошмо Штаттардын Украинадагы экс-элчиси Мари Йованович бар.

Трамп өз дарегине айтылган айыптоолордун бардыгын четке кагууда. Өз кезегинде Майк Помпео Өкүлдөр палатасындагы демократтар Мамлекеттик департаменттин кызматкерлерин коркутуп жатышканын билдирди. Сентябрдын аягында Вашингтондо АКШнын президенти менен жолуккан Зеленский телефондук сүйлөшүү маалында Трамп ага басым кылбаганын билдирген.

www.