748 Бардыгы /

Таластагы кыз алуу качуу боюнча Интернетте тараган тасманын чоо-жайы текшерилүүдө. Бул тууралуу «Азаттыкка» Талас облустук милициясы кабарлады. Маалыматка ылайык, учурда ал тасмадагы маалыматтар боюнча териштирүү жүрүп жатат. Ал эми кыз ала качуу боюнча милицияга расмий арыз келип түшкөн эмес.

Буга чейин социалдык тармактарда тараган тасмада көшөгөнүн артында жаш кызды күч менен кармап жаткан аялдарды жана той ырларын ырдап жаткан жаштарды көрүүгө болот. Тасмадагы кыз 16 жашта экени, аны 35 жаштагы жигит күч менен алып качып келгени жазылган.

Бул видео социалдык тармактарда бир топ талкуу жаратты.

Кыргызстанда кыздарды өз эркине карабай ала качуу аркылуу турмушка узаткан учурлар көп талкууланып келет. Былтыр ала качууга туш болгон 20 жаштагы Бурулай Турдаалы кызы милиция башкармалыгынын имаратында бычакталып каза болгон соң бул маселе боюнча жазаны күчөтүү тууралуу демилге көтөрүлгөн болчу.

Жаңы кабыл алынган Жазык кодексине ылайык быйыл Кыргызстанда ала качуу үчүн жаза күчөтүлгөн. Мыйзам боюнча кызды күч менен ала качкан адам 5 жылдан 10 жылга чейин эркинен ажыратылат. Ал эми өспүрүм кызды мажбурлап никеге тургузгандар 200 000 сом өлчөмүндө айыпка да жыгылат.

www.