855 Бардыгы /

АКШда Сенаттын чалгын комитети Орусиянын америкалык коомчулуктун аң-сезимине таасир этүү үчүн социалдык түйүндөрдү колдонгондугу тууралуу баяндамасын жарыялады.

Баяндаманын авторлору Кремль колдогон «троллдор фабрикасы» президенттикке талапкер Дональд Трамптын популярдуулугун арттырып, ошол эле маалда анын негизги атаандашы Хиллари Клинтонду жаманатты кылуу максатында иш алып барган деп эсептешет.

8-октябрда жарыяланган баяндамада Орусиянын «Интернет изилдөөлөр агенттигинин» иши бүгүнкү күнгө чейин уланып жаткан мааалыматтык согуштун бир бөлүгү болгону белгиленген. Анда иштегендер Кошмо Штаттардын саясий жана коомдук чөйрөсүндө пикир келишпестиктерди жана талаш-тартышты жаратууга аракет кылышкан.

Башкы кеңсеси Санкт-Петербург шаарында жайгашкан жана «троллдор фабрикасы» деген аталыш менен белгилүү «Интернет изилдөөлөр агенттигине» Кремлге жакын ишкер Евгений Пригожин ээлик кылат. Бул агенттик жөнүндө Орусиянын АКШдагы президенттик шайлоого ыктымал кийлигишкенин изилдеген атайын прокурор Роберт Мюллердин баяндамасында дагы бир нече жолу айтылган. Мюллердин баяндамасы быйыл апрелде жарыяланган.

Вашингтон АКШга каршы багытталган аракеттери үчүн «троллдор фабрикасына» тиешеси бар бир нече юридикалык жана жеке жактарга, анын ичинде Пригожинге карата санкцияларды киргизген.

www.