КАРА-СУУ ШААРЫ КЫШКА ДАЯРБЫ?

2,275 Бардыгы /

Бир айдан кийин эле жергебизге кадимки кыш баш багат. Ага карата деги камылга кандай? Тургундар былтыркыдай ызгаарда суукка тоңушпайбы? Бул ирет Ош шаарына ирегелеш айтылуу Кара-Суу шаарына баш бактык.

– Тээ Союз мезгилинен бери эле Кара-Суу шаарынын өзүнүн канализациясы дегеле болгон эмес! – деп агынан жарылды Кара-Суу шаарындагы таза суу муниципалдык ишканасынын жетекчиси Хаят ТУРДУКУЛОВ.

– Ошондуктан, Европа Реконструкциялоо жана Өнүктүрүү Банкы, Европа Инвестиция Банкы жана Европа Биримдиги Уюму менен абдан тыгыз иштешип, акыры булардын дагы эптеп тилин таап, көйгөйүбүздү биротоло жайгарууга ынандырдык. Бул максатта атайын долбоорубузга 5 миллион 300 миң евро ажыратылды. Азыр техникаларды сатып алып, аларга ылайыктап гараж дагы курдук. Ошентип, канализация проблемасынан жакын арада кутулабыз.

– Кара-Суу шаарында беш көп кабаттуу үй бар. Буларда канализация таптакыр жок! Андыктан, үйлөр таптакыр жылытылбагандыктан, кышында көбүнчө электр энергиясына гана күч келип жатат, – деди Кара-Суу шаарындагы 16-кварталдык комитеттин төрайымы Курбанжан ШАКЕЕВА.

– Ошентсе дагы, энергетиктерге ыракмат, бизге боору ачып, жарыгыбызды эч өчүрүшпөйт. Анын үстүнө өзүбүз деле айла кеткенде электр энергиясына карызыбызды көбөйтпөстөн убагында төлөгөнгө көндүк.

– Шаарыбыз абдан эле тар. Болбосо, калкыбыздын саны жыл сайын көбөйүп гана баратат. Андыктан, жаңы мектептерге, ошондой эле бала бакчаларга абдан муктажбыз! – деп кепке кошулду Кара-Суу шаардык Кеңешинин депутаты, калаадагы 13-кварталдык комитеттин төрайымы Айнура БЕГМАТОВА.

– Айткандан, албетте, уяласың. Чынында, шаарыбызда канализациянын аты түгүл, жыты жок! Эгерде Кыргыз Өкмөтү аталган кичи шаардын келечегин чындап эле ойлосо, бул олуттуу көйгөйдү кечеңдетпестен гана чечүүсү абзел! Буга улай эле жанаша жайланышкан Айыл Өкмөттөрүнүн эсебинен Кара-Суу шаары мындан дагы кеңейтилип, калаага заманбап көп кабаттуу үйлөр байма-бай курулушу кажет. Ошондо гана турак жай, башка дагы социалдык маселелер өзүнөн-өзү жайгарылат.

Кара-Суу шаарынын вице-мэри Шавкат ОСМОНАЛИЕВ дагы кышка камылга жайында экендигин ырастады. Шаарыбызда жети мектеп, үч бала бакча бар. Эки мектепке көмүр жагылат. Эки мектеп борборлоштурулган жылытуу түйүнүнө туташтырылган. Калгандары электр энергиясы менен гана жылытылат, – деп маалымдады Кара-Суу шаарынын вице-мэри Шавкат ОСМОНАЛИЕВ.

– Баарына тең кыш бою 290 тонна көмүр керектелет. Азыр 233 тоннасын ээлерине жеткирдик. Дагы 57 тоннасын кыш түшкүчө ташыйбыз. Ал эми калаабыздагы канализация маселеси Европа Реконструкциялоо жана Өнүктүрүү Банкы, Европа Инвестиция Банкы жана Европа Биримдиги уюмунун жардамы аркасында чукул арада чечилмекчи.

Айтмакчы, Кара-Суу шаары 1960-жылы негизделген. Ош облусунун түштүк-батыш бөлүгүндө, Кара-Суу районунун так ортосунда жайланышкан. Он алты кварталдык комитеттен куралган. 25 568 калк жашайт. Мунун 830у кыргыздар, 15 596сы өзбектер, калгандары – орустар, украиндер, татарлар, уйгурлар, түктөр, тажиктер жана казактар.