2,432 Бардыгы /

Бүгүн, 9-октябрда Жалал-Абад шаарында экинчи жер асты өтмөгү пайдаланууга берилди. Ага жергиликтүү бийлик өкүлдөрү, аксакалдар жана шаар тургундары катышты.

Аталган өтмөктүн курулуш иштери ушул жылдын май айында башталган. Узундугу 40, туурасы 9 метрди түзөт. Алдыда жер асты өтмөктөрүнө видео байкоочторду орнотуу пландалып жатат. Жалпысынан 24 соода түйүнү орун алып, жакынкы күндөрү ачык сынак менен ижарага берилет. Бул туралуу шаар мэри Мураталы Тагаев билдирди.

– Быйылкы жылы шаар бюджетинен жер асты өтмөгүн куруу үчүн 30 миллиондон ашык акча каражаты каралган. Үч курулуш фирмасы катышып, алардан оштук “Сафари” курулуш компаниясы тендерден 21 миллион сомго утуп алган. Негизи курулуш иштери 12-майда башталган, 4 айдын ичинде элге пайдаланууга тапшырып олтурабыз. Өзгөчөлүгү катары өтмөктүн ичинде 24 соода түйүнү орун алды. Мунун баары муниципалдык болуп, жакынкы күндөрдө ачык сынак менен ижарага беребиз. Андан түшкөн каражат толугу менен шаар бюджетине кошулат” – дейт М.Тагаев.

Өтмөктүн курулганына шаар тургундары да ыраазы. Анткени буга чейин Нагима Айтматова жана Ленин көчөлөрүнүн кесилишинде жол тыгындары орун алып, тургундар үчүн бир топ кооптуулук жаралып келген.

-Бүгүн Жалал-Абад шаарында кубанычтуу күн болуп жатат. Биздин балдарыбыздын, неберелерибиздин деги эле шаар тургундарынын коопсуздугу сакталды десем болот. Анткени буга чейин бул жерде жол тыгыны көп болуп, жаш балдарыбыз жолдон чуркап өтө беришчү. Бул баарына кооптуу көрүнүш эле – дейт шаар тургуну Арстанбек Орунбаев.

Эске сала кетсек, Жалал-Абад шаарындагы эң алгачкы жер асты өтмөгү былтыркы жылы Нагима Айтматова жана Ленин көчөлөрүнүн кесилишине курулган. Экинчи жер асты өтмөгү аны улай эле Ленин көчөсүнө курулду. Аталган жайлар шаардын так борбору болгондуктан жөө адамдардын да, унаалардын да каттамы көп болуп, жол тыгыны кооптуулук жаратып келгендиктен жергиликтүү бийлик маселени  жер асты өтмөгүн куруу менен чечүүнү туура көргөн.

Бүбүсара ОРОЗАЛИЕВА, “Аймак”