3 Бардыгы /

Бүгүн, 28-январда Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев “Евразия Кыргызстан” регионалдык кенсесинин директору Кымбат Урумкулова менен жолугушту.

Жолугушуунун жүрүшүндө Тилек Текебаев фонддун Кыргыз Республикасында билим берүү, гуманитардык жана жаштар тармактарын өнүктүрүүгө кошуп келе жаткан салымын жогору баалап, кызматташууну мындан ары да кеңейтүүгө кызыкдар экенин билдирди.

Өкүл “Евразия” фонду тарабынан ишке ашырылып жаткан социалдык маанидеги долбоорлорго, анын ичинде мектеп автобустарынын тапшырылышына, социалдык дүкөндөрдүн ачылышына, орус тили жана маданияты борборунун ишке киришине токтолду. Айрыкча буга чейин Жалал-Абад облусунун алыскы айыл аймактарына 10 даана мектеп автобустарынын бөлүнүп берилиши, окуучулар жана айыл тургундары үчүн чоң жардам болгонун белгиленди.

Ошондой эле облус аймагында билим берүү тармагын өнүктүрүү, санариптештирүү жана жаштар арасында спортту жайылтуу багытында системалуу иштер жүргүзүлүп жатканы айтылды.

Жолугушуунун жыйынтыгында “Евразия” фонду тарабынан билим берүү сапатын жакшыртуу, социалдык дүкөндөрдү уюштуруу, ошондой эле 35 жашка чейинки шаардык кеңештин депутаттары үчүн жасалма интеллектти колдонуу боюнча окутуу иш-чаралары уюштурулары белгиленди. Облус башчысы аталган демилгелерди ар тараптуу колдоого алаарын кошумчалады.