1,863 Бардыгы /

Кыргызга бир келген табышмактуу керемет инсан Барпы Алыкуловдун өмүрү чыгармачылыгы боюнча тарыхый тасма тартылат. Бул тууралуу анын режиссеру Рысбек Жабиров бүгүн Б.Алыкуловдун 135 жылдык маарекесинде билдирди.

Анын айтымында аталган тасма эмдики жылдан тартып, тартыла баштайт.

– Кыргыз филологиясынын атасы Х.Карасаев: “Барпынын  китебин жаздыртып, башыма коюп жаттым. Себеби ырларынын алты тили бар экен” – деп өтө баа берген жери бар экен. Өмүрүндө 67 акын менен айтышып, биринен да жеңилбептир. Мына ушундай кишинин тасмасын тартуу да оор турат. Бирок биз ага карабай аксакалдардан бата алып, сценарийин жазып киришкенбиз. Учурда бул 105 бет болуп аяктап калды. Ал эми сценарийин Б.Ажымаматова деген эжебиз менен чогу жазып жатабыз. Төрт мезгил тең камтылып, кинону эмдики жылы тартып баштайбыз. Бул тасма тарыхый жана узагыраак болот. Анткени биз тактап чыккан маалымат боюнча алтымыштан ашуун тарыхый замандаштары  катышат. Мындан сырткары ал эмне үчүн 21 жолу үйлөнгөн? – мунун ар биринде өзүнчө чоң философия жатат.

Ал эми Барпы атабыздын жаш кезиндеги башкы ролун чындыгында тактай элекпиз. Ал эми андан кийинки өмүрүнүн акырына чейинки ролду режиссер, актер, учурда Ош драма театрынын башкы режиссеру болуп иштеп жаткан Талант Апыев деген кишини сүйлөшүп койгонбуз. Тасма негизинен өлкөнүн ар булуң-бурчунда тартылат. Каржылоо жагы жеке болот. Бул боюнча дагы өз учурунда айтайын. Анткени бул багытта мекенчил, патриот инсандар менен иштешип жатам.

Бүбүсара ОРОЗАЛИЕВА, “Аймак”