Юлия Юзик өткөн аптада Тегеранда камакка алынган. Журналист Иранга жеке чакыруу менен келген. Анын паспортун аэропорттон түшөрү менен эле алып коюшкан жана өлкөдөн чыгып баратканда кайтарылып берилерин айтышкан.

4-октябрда Ирандын Тышкы иштер министрлиги Юзик «бир катар түшүндүрмөлөрдү алуу үчүн» кармалганын жана жакында бошотула турганын билдирген. Мындан тышкары бийлик өкүлдөрү журналист виза маселесинен улам кармалганын да айтышкан.

Бирок журналист өзү телефон аркылуу туугандары менен сүйлөшкөндө Израилдин пайдасына тыңчылык кылууга айыпталып жатканын кабарлаган.

Буга чейин «Чек арасыз кабарчылар» уюму Юзиктин бошотулушун талап кылган.

Юлия Юзик – жанкечти аялдардын тагдырын, Беслан трагедиясын баяндаган китептердин автору.