874 Бардыгы /

9-октябрда Душанбеде Аялдардын республикалык форуму өттү. Ага көпчүлүк күткөндөй өлкө башчынын кызы жана президенттик администрациянын жетекчиси Озода Рахмон катышкан жок.

Иш-чара катышуучуларынын көбү форумга Озода Рахмон келсе, тажик аялдарынын бир топ маселеси чечилет деп үмүттөнүп жатышкан. Бирок жыйын маалында форум жакында эле «Аялдар — саясий лидерлер» деп аталган эл аралык уюмдун элчиси болгон Озода Рахмондун колдоосу менен өтүп жатканы белгиленди.

Форумга мекеме-ишканалардын жетекчилери менен активист аялдар катышып, мамлекетти башкаруудагы, экономиканы өнүктүрүүдөгү жана үй-бүлөлүк зомбулукту азайтуудагы аялдар менен кыздардын ролу жана аялдардын экстремисттик топторго кошулуп кетүүсүн алдын алуу маселелери талкууланды.

Тажикстандын башкы прокурорунун биринчи орун басары Хотам Назарзода жергиликтүү бийлик өкүлдөрүнө кайрылып, аймактардагы аялдар менен кыздардын арасында экстремисттик топтордун кооптуу экендиги тууралуу маалыматтык иш-чараларды өткөрүп турууну сунуштады.

Бийликтин маалыматына караганда, 250 тажик аял Жакынкы Чыгыштагы экстремисттик топтордун катарына кошулуп кеткен. Алардын жарымы каза болсо, башкалары камакка алынган.

Тажикстанда аялдар жогорку мамлекеттик кызматтарга дайындалбайт. Адатта аларга министрликтер менен мекемелердеги экинчи жана үчүнчү баскычтагы кызмат орундары берилет. Учурда тажик өкмөтүндө бир гана аял жетекчи кызматта иштейт — ал эмгек жана миграция министри Сумангул Тагойзода.

www.