2,910 Бардыгы /

ЖЕНЕВА. Кыргыз Республикасынын Тышкы иштер министри Чыңгыз Айдарбеков Бүткүл Дүйнөлүк соода уюмунун (БДСУ) Баш директору Роберто Азеведо  менен дагы жолугушту.

Жолугушуунун жүрүшүндө тараптар Кыргызстан менен БДСУнун ортосундагы өз ара кызматташуунун учурдагы абалы жана аны андан ары өнүктүрүү жана кеңейтүү келечеги туурасында талкуулашты. Министр Кыргызстан БДСУга 1998-жылы советтик өлкөлөрдүн ичинен эң биринчи болуп кошулуп, бул Уюмда мүчөлүктүн артыкчылыктарын сезип жаткандыгын билдирди жана деңизге чыгууга мүмкүнчүлүгү жок, өнүгүп келе жаткан мамлекет катары бул фактга өзгөчө маани берээрин баса белгиледи. Кыргызстандын БДСУга мүчөлүгүнүн 21 жыл ичинде өлкөнүн соода жүгүртүүсү – 1,404 миллиард АКШ доллардан 6,672 милиард АКШ долларына чейин 4,5 эсеге көбөйгөн. Кыргыз Республикасы БДСУнун 130дан ашуун мүчө-мамлекеттери менен соода-экономикалык байланыштарды жүргүзүп келатат. Тышкы соода жүгүртүүнүн жалпы көлөмүндө БДСУга мүчө-өлкөлөр 93,6 пайызды ээлейт, мунун ичинде, экспорттоо – 89,1, импортто – 95,2 пайыз.

Тараптар Кыргызстандын БДСУнун алкагындагы бир катар негиз болуучу Эл аралык документтерге кошулуу келечегин, ошондой эле өлкөгө карата күчүнө кирген БДСУнун конвенцияларын жана макулдашууларын ишке ашыруунун жүрүшүн дагы катуу талкуулашты. Кыргызстан экологиялык таза жана органикалык продукцияны өндүрүүчү жана жабдып туруучу мамлекет катары Дүйнөлүк соодада өзгөчө орду бар экендигине, буга байланыштуу БДСУнун аянтында башка кызыкдар мамлекеттердин тобу менен бирге органикалык таза айыл чарба товарлары үчүн либералдык шарттарды түзүү жана алар менен соода жүргүзүүнү алдыга жылдыруу механизмдерин киргизүү эрежелерин иштеп чыгуу тууралуу демилге көтөрүү мүмкүндүгүн караштырып жаткандыгына көңүл бурулду. Министр Кыргыз тарап Кыргыз Республикасынын мамлекеттик органдарынын адистеринин жана академиялык чөйрө өкүлдөрүнүн дараметин күчөтүүгө багытталган Улуттук жана Эл аралык тренингдерди өткөрүү тармагындагы БДСУнун Катчылыгы менен болгон кызматташтыкты улантууга кызыкдар экендигин дагы ачыктап, Уюмдун Катчылыгы тарабынан Кыргыз тарапка үзгүлтүксүз көрсөтүлүп жаткан консультациялык, техникалык жана билим берүү жаатындагы көмөк көрсөтүүсү үчүн терең ыраазычылык билдирди.

Соңунда БДСУнун Баш директору Р.Азеведо Кыргызстандын эл аралык соода жүргүзүүгө кошкон салмактуу салымын жогору баалап, аны чыңдоо үчүн өлкөнүн жасап жаткан аракеттерине терең ыраазычылыгын билдирди.

Алишер ТОКСОНБАЕВ, өз кабарчы