1,139 Бардыгы /

Түркияда социалдык түйүндөр аркылуу Анкаранын Сириядагы аскердик операциясын сындаган 24 адам камакка алынды. Бул тууралуу өлкөнүн мамлекеттик Anadolu агенттиги кабарлады.

Бийлик интернет колдонуучулардын мындай билдирүүлөрүн «жалган кабар» деп атоодо.

«Reuters» агенттигинин маалыматына караганда, Анкара жортуул тууралуу терс билдирүү тараткан жүздөгөн адамга, анын ичинде күрд депутаттарына карата иликтөө баштады.

Түркия менен анын өнөктөштөрү Сириянын түндүгүндөгү күрд кошуундарына 9-октябрдан тарта чабуул коё баштаган. Анкара анын аскердик операцияларынын башкы максаты чек арасына чектеш аймакта «коопсуз аймак түзүү», ал жерди өзүн террордук топко теңеген күрд кошуундарынан арылтуу экенин билдирген.

Түрк бийлигинин аскердик операциясын АКШдан сырткары Европа Биримдиги жана Араб өлкөлөрүнүн лигасы айыптоодо.

Сириянын адам укуктарына көз салуу борбору Түркиянын операциясы башталгандан бери кеминде 70 жай тургун каза болгонун, алардын арасында 21 кичинекей бала бар экенин билдирди. Уюмдун маалыматына караганда, 300 миңге жакын адам өз үйлөрүн таштап кетүүгө аргасыз болгон.

www.