2,880 Бардыгы /

Турдакун Усубалиевдин Күрп-Сай ГЭСинин курулушуна кошкон баа жеткис салымын белгилеп, ага аталган станцияга ысымын берүү жөнүндө чечим кабыл алынды. Бул тууралуу 18-октябрда Президент С.Жээнбеков Токтогул ГЭСин реконструкциялоонун биринчи фазасы аяктаган иш-чарада ардагер энергетиктерди куттуктап жатып билдирди.

-Быйыл Кыргызстандын энергетика тармагы өзүнүн 85 жылдык юбилейин белгилейт.  Учурдан пайдаланып, өлкөнүн бардык энергетиктерин бул майрам менен чын пейлимден куттуктайм. Бүгүн арабызда республиканын энергетикасынын ардагерлери катышып олтурушат. Урматтуу ардагерлер, Сиздер өзүңүздөрдүн ак ниет эмгегиңиздер менен биздин өлкөбүздүн өнүгүүсүнө баа жеткис салым коштуңуздар.  Стратегиялык маанилүү тармакта жетишкен натыйжалар менен сыймыктанууга толук укугуңуздар бар.  Сиздер кесипкөйлүк жана иш билгилик менен өлкөбүздү жарык жана жылуулук менен камсыз кылдыңыздар. Биздин өлкөнүн бардык ГЭСтерин курууга катышкан Кыргыз Республикасынын Баатырлары Акбаралы Кабаевге, Курманбек Арыковго өзгөчө ыраазылык билдиргим келет.

Энергетиканын юбилейин белгилөө учурунда дагы бир ардактуу ардагерибиз – Турдакун Усубалиевичти эскерип кетүү абзел. Анын Күрп-Сай ГЭСинин курулушуна кошкон салымы баа жеткис. Ошол үчүн аталган станцияга Турдакун Усубалиевдин ысмын берүү жөнүндө чечим кабыл алынды.

Урматтуу энергетиктер! Сиздердин татаал жана зарыл эмгегиңиздер үчүн ыраазылык билдирем. Ушул майрам күнү, өлкөбүздүн энергетика тармагын өнүктүрүп, экономикага өз салымын кошуп жаткан жалпы кызматкерлерге рахмат айтам, – деди С.Жээнбеков.

Кошумчалай кетсек, Токтогул ГЭСи 1975-жылы ишке киргизилгенден тартып иштеп, станциянын негизги жабдуусунун техникалык ресурсу иштелип бүткөн. Аны реконструкциялоо жүргүзүлгөн эмес, ушул себептен ГЭСтин жабдуулары моралдык жактан эскирип, толугу менен алмаштырууну талап кылган. Натыйжасында ири долбоор ишке кирип, ГЭСти жаңылоо үч фазадан турары орун алган.  Биринчи фазасын ишке ашыруу 2017-жылдын май айында башталган.

Бүбүсара ОРОЗАЛИЕВА, “Аймак”