1,616 Бардыгы /

ЖАЛАЛ-АБАД. Тогуз-Торо жергесиндеги Тоту Мойдунов атындагы Макмал жалпы билим берүү орто мектебинде 21-февраль бүткүл дүйнөлүк эне тил күнү белгиленди.

Аталган майрамга утурлай мектептин англис тилчи мугалимдери ыктыярчылар менен биргеликте “Англис тилинде сабакты кызыктуу жана эффективдүү пландоо” деген темада тренинг өткөрдү. Тренингге райондун жалпы он үч мектебинен англис тилчи мугалимдери, мектеп окуучулары жана ыктыярчылар Кристиан Шепи, Зак Неймон, Риза Матсумура, Жон Лиулар катышышты. Иш-чаранын жүрүшүндө мектеп окуучулары кыргыз жана англис тилинде ыр, макал, жаңылмачтарды айтышып, мындан сырткары жомоктогу каармандардын образын чагылдырышты. Тренингдин аягында окуучулар ыр-бий менен коштосо, мугалимдер эки тилде Кыргызстан жөнүндө ыр менен иш-чараны жыйынтыкташты.

“Англис тилинде сабакты кызыктуу жана эффективдүү пландоо” деген аталыштагы тренингдин негизги максаты, район аймагындагы мектептерде англис тилчи мугалимдердин билим берүүдө тактап айтканда, англис тилин үйрөтүүдө сабакты кызыктуу өтүү менен эффективдүү пландоо каралган. Мындан сырткары стандарттуу сабактын пландарын окутуу  темасына да кайрылып ыктыярчылар менен биргеликте тажрыйба алмашып, алардан көп нерсени үйрөнгөнүн мугалимдер жашырган жок.

Негизги максат катары эне тилдин дүйнөлүк күнүнө карата ыктыярчыларга өз эне тилибизди кеңири таанытуу менен эки тилдин достугу даңазаланды.

Кошумчалай кетсек, бул күн 1999-жылы Бириккен Улуттар уюмунун агартуу, илим жана маданият маселелери боюнча уюму – ЮНЕСКО тарабынан жарыяланып, ошондон бери жыл сайын маданий жана тил байлыгын өркүндөтүү максатында белгиленип келе жатат.

Элбол Карбозов, Тогуз-Торо району