824 Бардыгы /

Казакстан президенти Касым-Жомарт Токаев Кордайда 11 кишинин өлүмүнө алып келген улут аралык кагылышуу аткезчилик менен алектенген эки кылмыштуу топтун бизнес талашынан улам келип чыкканын билдирди.

Бул тууралуу ал 1-мартта Жамбылдагы Каракемер айлынын тургундары менен жолугушуу учурунда билдирди.

— Аймакта аткезчилик менен алектенген кишилер бар экени белгилүү. Бул бизнеске башка топтор да кошулгусу келген. Бир сөз менен айтканда, мыйзамсыз кирешелерге көзөмөл жүргүзүүнү каалаган эки кылмыштуу топтун арасында жаңжал чыккан. Натыйжада көп киши жабыркады, 11 адам өлдү, – деген Токаев.

Токаев коомчулукту улут аралык биримикке чакырып, бөлүнүүгө жол бербөө зарылдыгын айтты. Ал Кордайдагы жаңжал өлкөнүн кадыр-баркына доо кетиргенин, бул окуя сабак болушу керектигин белгиледи.

Ал коопсуздук органдары күнөөлүүлөрдү кайсы улуттан экенине карабай жоопко тартышы керек экенин кошумчалады.

7-8-февралдагы жаңжал жалпысынан Масанчи, Аукатты, Сортөбө, Булан-Батыр айылдарында болгон жана окуя 11 адамдын өлүмү менен аяктаган. Дагы ондогон киши жаракат алган.

Расмий маалыматка ылайык, 30дай турак жай, 17 соода имараты жана 50дөй машине өрттөлүп, талкаланган. Кагылышка байланыштуу 23 миңден ашуун адам Кыргызстанга убактылуу качып келгенге аргасыз болгон.

Башкы прокуратура окуяга байланыштуу 25 кылмыш иши козголгонун билдирген, бирок канча адам кармалганы, канчасына айып коюлганы тууралуу маалымат бере элек.

Казакстандын президенти Касым-Жомарт Токаев улут аралык чатакка байланыштуу Жамбылдын губернатору, Кордойдун акими жана облустук, райондук полиция жетекчилери баштаган бир топ аткаминерди кызматтан алган.

Казакстанда улут аралык өңүттөгү кагылышуулар (жергиликтүү тажиктер, чечтендер, түрктөр менен) буга чейин да болгон. Казак бийлиги адатта андай учурларды турмуш-тиричиликтин айынан чыккан уруш-талаш катары сыпаттайт жана улут аралык деп мүнөздөбөйт.

www.