709 Бардыгы /

Орусия шашылыш түрдө Сириядагы деңиз жана аба күчтөрүн бекемдеп жатат. Бул тууралуу Reuters агенттиги Босфор кысыгындагы кемелердин кыймылы боюнча жүргүзүлгөн анализдердин жыйынтыгына, ошондой эле авиациялык статистикага таянып кабарлады.

Басылманын билдирүүсү 4-мартта, Түркия менен Орусия президенттери Режеп Тайып Эрдоган менен Владимир Путиндин Москвадагы жолугушуусуна бир күн калганда чыкты. Эки лидердин жолугушуусу Сириянын Идлиб провинциясындагы абал курчуп турган маалда өткөнү жатат. Аталган аймакта Сириянын президенти Башар Асаддын армиясы Орусиянын колдоосу менен оппозициялык топторго каршы чабуулдарын улантууда. Февралдын аягында Асад армиясынын аба соккуларынан 30дан ашык түрк аскери мерт болгондон кийин Түркия өкмөттүк күчтөргө каршы чабуулдарын баштаган.

Сириянын түндүк-батышындагы абалдын курчуп кеткенине байланыштуу сирия оппозициясынын бир бөлүгүн колдоп жаткан Түркия менен Орусиянын ортосунда түз аскердик кагылышуу болуп кетиши мүмкүн деген жоромолдор айтылууда.

Reuters агенттигинин маалыматына караганда, Орусия Сириядагы деңиз жана аба күчтөрүн 28-февралдан кийин бекемдей баштаган. 27-февралда Асад армиясынын аба соккуларынан ондогон түрк аскери мерт болгону кабарланган.

Ошол эле маалда Reuters былтыр октябрда АКШ Сириянын айрым райондорундагы аскерлерин чыгарып кеткенден кийин Орусия бул өлкөдөгү аскердик күчтөрүн мурдагыдан тезирээк темпте күчтөндүрө баштаганын белгилеген.

4-мартта түрк президенти Эрдоган Москвадагы сүйлөшүүлөрдөн кийин Идлибде ок атуу токтойт деп үмүттөнүп жатканын айткан.

Москва да Путин менен Эрдогандын жолугушуусунан кийин Идлибдеги абал жакшырат деген ишенимин билдирген.

www.