1,185 Бардыгы /

БИШКЕК. Президент Сооронбай Жээнбеков Кыргыз Республикасынын вице-премьер-министри Эркин Асрандиевди кабыл алды.  Жолугушууга Президенттин Аппарат жетекчисинин биринчи орун басары Алмаз Кененбаев, Коопсуздук Кеңешинин катчысы Дамир Сагынбаев жана саламаттыкты сактоо министри Космосбек Чолпонбаев катышышты.

Коронавирустун токтоосуз жайылышы боюнча кырдаалга байланыштуу экономикалык коопсуздукка болгон терс кесепеттерди, тобокелчиликтерди жана коркунучтарды минималдаштыруу боюнча чаралар кенен-чонон талкууланды. Вице-премьер-министр Эркин Асрандиев Коопсуздук Кеңешинин чечимине ылайык, үстүбүздөгү жылдын 3-мартынан тартып тышкы терс таасирлердин кесепеттерин минималдаштырууга жана экономикалык өнүгүүнүн өбөлгөлөөгө багытталган экономикалык иш-чараларды жүзөгө ашыруу боюнча республикалык штаб түзүлгөндүгүн ачыктады.Базарлардагы кырдаалгатуруктуу көз салуу, атамекендик өндүрүшчүлөрдү, жүк ташуучуларды, негизги жеткирип берүүчүлөр менен импортерлорду колдоо боюнча чаралар камтылган биринчи кезектеги иш-чаралар планы иштелип чыкканы баса белгиленди.

Эркин Асрандиев жер-жерлердеги реалдуу кырдаалга көзөмөл жүргүзүү үчүн райондук деңгээлдерде дагы кудум ушундай эле штабдарды түзүү чечими кабыл алынгандыгын баса белгиледи. Жалпысынан республика боюнча абал туруктуу, ушул тапта негизги товарлардын запасы, көлөмү жетиштүү экендиги айтылды.

Президент Сооронбай Жээнбеков Республикалык штабдын ишинин максималдуу натыйжалуулугун камсыздоо зарылдыгын баса белгиледи. Штабдын негизги милдеттери — дүйнөдөгү экономикалык кырдаалга анализди эске алуу менен таасирдүү сунуштарды иштеп чыгуу жана алардын негизинде мамлекеттик органдар тарабынан тиешелүү зарыл чараларды көрүү экендигин эскертти. Мамлекет башчысы Республикалык штаб негизги көңүлдү азык-түлүк коопсуздугун камсыздоого, өлкө бюджетинин киреше бөлүгүн  аткарууга, эл керектеген товарлардыөндүрүү жана ташып келүү менен алектенген ишкерлер менен тыгыз кызматташууга бурушу керектигин дагы баса белгиледи.

Алишер ТОКСОНБАЕВ, өз кабарчы